Ushtria e Pakistanit publikoi të shtunën një video ku pretendon se tregohet lëshimi i raketave nga një vendndodhje e panjohur, më 10 maj. Mediat pakistaneze raportojnë se ky është një reagim ndaj një sulmi të pretenduar nga India, që sipas tyre, ka shënjestruar tre baza ajrore brenda territorit të Pakistanit.
Televizioni shtetëror i Pakistanit njofton se kundërsulmet janë duke u zhvilluar, ndërsa tensionet mes dy vendeve janë në rritje.
Burime zyrtare konfirmuan se Pakistani ka nisur një fushatë të gjerë ushtarake, me emrin koduar “Operacioni Bunyanun Marsoos”, që në arabisht nënkupton “strukturë konkrete”. Kjo lëvizje vjen si përgjigje ndaj, siç thuhet, provokimeve të vazhdueshme nga pala indiane.
Për momentin, autoritetet indiane nuk kanë dhënë ndonjë deklaratë zyrtare lidhur me pretendimet e Pakistanit.
Situata mbetet e tensionuar dhe me potencial të lartë për përshkallëzim të mëtejshëm, ndërsa komuniteti ndërkombëtar po ndjek zhvillimet me shqetësim.
