Një ngjarje e rëndë ka ndodhur mbrëmjen e së hënës rreth orës 18:00 në fshatin Stanovc të komunës së Vushtrrisë, ku një 27-vjeçar është plagosur nga arma e zjarrit.
Sipas njoftimit zyrtar të Policisë së Kosovës, viktima është dërguar menjëherë për trajtim mjekësor dhe ndodhet jashtë rrezikut për jetën, sipas autoriteteve shëndetësore.
Hetimet e para tregojnë se në vendin e ngjarjes janë gjetur katër gëzhoja, ndërsa policia, nën udhëheqjen e prokurorit kompetent, ka nisur hetimet për veprën penale “Vrasje e rëndë e mbetur në tentativë”.
Ndërkohë, i dyshuari është ende në arrati dhe Policia e Kosovës ka nisur kërkimet për kapjen e tij. Autoritetet i bëjnë thirrje qytetarëve që të bashkëpunojnë duke ofruar informacione që mund të ndihmojnë në identifikimin dhe arrestimin e të dyshuarit.
