Policia e Kosovës ka arrestuar dy persona të dyshuar për veprën penale “Rrëmbim në tentativë në bashkëkryerje”, pas një incidenti që ndodhi në veri të Mitrovicës.
Sipas njoftimit zyrtar të Policisë, rasti është raportuar më 10 tetor 2025, rreth orës 18:15, kur një vajzë e mitur, në shoqërinë e nënës së saj, është afruar nga një automjet me dy persona të panjohur në rrugën “Zveçanska” në Mitrovicën Veriore.
Të dyshuarit i kishin kërkuar vajzës që të hipte në automjetin e tyre, ndërsa e mitura ka reaguar me shpejtësi duke incizuar momentin me telefonin e saj dhe në vijim ka lajmëruar Policinë. Menjëherë pas raportimit, njësitë policore kanë dalë në vendngjarje, por të dyshuarit ishin larguar në drejtim të panjohur.
Arrestimi i të dyshuarve
Pas hetimeve të shpejta operative, Policia ka arritur të identifikojë dhe arrestojë brenda disa orësh dy persona në zonën e Mitrovicës së Jugut:
-
A.P. (1984) – i arrestuar rreth orës 19:55, nën ndikimin e alkoolit me 1.04‰,
-
G.M. (1989) – i arrestuar rreth orës 20:55, nën ndikimin e alkoolit me 0.66‰.
Të dyshuarit janë arrestuar mbi bazën e provave të siguruara dhe dyshimit të arsyeshëm se kanë qenë të përfshirë në tentativën për rrëmbim.
Hetimet vazhdojnë
Me urdhër të prokurorit të shtetit, ndaj tyre është iniciuar rasti për veprën penale “Rrëmbim në tentativë në bashkëkryerje”, ndërsa të arrestuarit janë ndaluar për 48 orë.
Për shkak se ishin nën ndikimin e alkoolit, intervistimi i tyre do të vazhdojë në ditët në vijim.
Policia e Kosovës thekson se mbetet e përkushtuar në zbatimin e ligjit dhe garantimin e sigurisë publike, duke vepruar me efikasitet ndaj çdo rasti të ngjashëm.
