Një tërmet me magnitudë 6 goditi mbrëmjen e së hënës rajonin e Balikesirit në Turqi, duke shkaktuar panik mes banorëve të Stambollit, Izmirit, Manisas dhe Tekirdağut.
Sipas Agjencisë Turke për Menaxhimin e Fatkeqësive (AFAD) dhe Qendrës Euro-Mesdhetare Sizmologjike (EMSC), tërmeti ndodhi rreth orës 22:49 me orën lokale, në një thellësi prej 6 kilometrash. Lëkundjet u ndjenë të zgjatura, duke detyruar shumë qytetarë të dilnin menjëherë nga banesat për t’u strehuar në hapësira të sigurta.
Autoritetet turke ndodhen në terren për të vlerësuar dëmet, dhe deri më tani nuk raportohet për viktima apo dëme të mëdha materiale.
Turqia është një nga zonat më aktive sizmikisht në botë, e ndodhur mbi vijën e Anadollit të Veriut, pranë rajonit të Marmaras ku ndodhet Stambolli. Në gusht të këtij viti, një tërmet i ngjashëm në Sındırgı shkaktoi një viktimë dhe dëmtime të ndërtesave./Qendra.INFO
