Ish-presidenti i Kosovës, Hashim Thaçi, është deklaruar i pafajshëm për aktakuzën e dytë që i është ngritur nga Dhomat e Specializuara të Kosovës lidhur me ndërhyrje në administrimin e drejtësisë.
Gjatë paraqitjes para gjykatës, Thaçi u pyet nga gjyqtari për qëndrimin e tij ndaj akuzave, ndërsa ai u përgjigj shkurt: “Plotësisht i pafajshëm.”
Të pafajshëm janë deklaruar edhe të akuzuarit e tjerë në këtë rast:
-
Bashkim Smakaj
-
Fadil Fazliu
-
Isni Kilaj
-
Hajredin Kuçi
Aktakuza ndaj tyre ishte konfirmuar më 29 nëntor 2024 nga gjykatësja e procedurës paraprake, e cila kishte lëshuar edhe fletarrestime për disa prej të dyshuarve dhe një fletëthirrje.
Sipas aktakuzës, të akuzuarit dyshohen për përpjekje të paligjshme për të ndikuar në dëshmitë e dëshmitarëve në procesin gjyqësor për krime lufte ndaj Thaçit dhe të tjerëve.
Ndërkohë, kryeprokurorja e specializuar Kimberly West deklaroi se Thaçi akuzohet për ndërhyrje sistematike në dëshmitarë dhe për shkelje të urdhrave gjyqësorë që synojnë mbrojtjen e informacionit konfidencial.
Sipas saj, veprimet e pretenduara janë dokumentuar përmes audio-incizimeve të siguruara me autorizim të gjykatës dhe janë zhvilluar në takime që nuk kishin status të privilegjuar.
