Tirana është sot epiqendra e Evropës, teksa mirëpret Samitin e Komunitetit Politik Evropian, një ngjarje historike që sjell në kryeqytetin shqiptar 53 liderë të lartë evropianë – përfshirë presidentë, kryeministra dhe përfaqësues nga Bashkimi Evropian, NATO dhe OSBE.
Samiti mbahet në sheshin “Skënderbej”, dhe është organizuar nga Presidenti i Këshillit Evropian, António Costa, në bashkëpunim me Kryeministrin Edi Rama. Punimet nisin në orën 11:00 dhe përmbyllen në 18:30 me një konferencë të përbashkët për shtyp nga Kryeministri Rama dhe Kryeministrja e Danimarkës, vendi që do të organizojë samitin e ardhshëm. Tema qendrore e samitit është: “Evropa e re në një botë të re: Unitet – Bashkëpunim – Veprim i përbashkët”.
Në kuadër të këtij samiti, Kryeministri Rama priti zyrtarisht Presidentin e Këshillit Evropian, António Costa. Gjatë konferencës për media, Rama e përshkroi rrugën e Shqipërisë drejt BE-së si një “histori dashurie”, ku vendi duhet të vazhdojë të bëjë “detyrat” deri sa të hapet dritarja evropiane.
“Unë nuk e kam humbur asnjëherë besimin. Kjo është një histori dashurie – ti s’duhet të dorëzohesh, derisa të hapet dritarja. Dritarja është hapur, çarçafi është hedhur dhe tani ne duhet të ngjitemi,” – tha Rama.
Nga ana e tij, Antonio Costa e konsideroi shumë të mundur anëtarësimin e Shqipërisë në BE deri në vitin 2030, duke theksuar se gjithçka varet nga përkushtimi i qeverisë shqiptare dhe vetë qytetarëve.
“Jam i sigurt se Shqipëria do të bëhet vend anëtar shumë shpejt,” – u shpreh Costa, duke përgëzuar gjithashtu Edi Ramën për fitoren në zgjedhjet e 11 majit.
Në mesazhin e tij, Presidenti i Këshillit Evropian theksoi se integrimi i Shqipërisë është “investimi më i madh gjeopolitik” i BE-së dhe se ruajtja e ritmit, veçanërisht në luftën kundër korrupsionit, është thelbësore për përmbushjen e këtij objektivi të përbashkët.
“Europa nuk është vetëm begati dhe vlera – ajo ka nevojë për fytyrën tonë të përbashkët,” – përfundoi Costa.
