Presidenti i Ukrainës, Volodymyr Zelenskiy, do të zhvillojë të dielën një takim me Presidentin e Shteteve të Bashkuara, Donald Trump, në Florida, ku në fokus do të jenë çështjet territoriale dhe garancitë e sigurisë, pengesat kryesore në përpjekjet për t’i dhënë fund luftës në Ukrainë.
Duke njoftuar takimin, Zelenskiy tha se “shumë gjëra mund të vendosen para Vitit të Ri”, ndërsa Uashingtoni po shton presionin diplomatik për t’i dhënë fund luftës së nisur nga Russia, konfliktit më vdekjeprurës në Evropë që nga Lufta e Dytë Botërore.
“Sa i përket çështjeve të ndjeshme, do të diskutojmë si për Donbasin, ashtu edhe për termocentralin bërthamor të Zaporizhzhias. Sigurisht, do të ketë edhe tema të tjera”, u shpreh Zelenskiy në një deklaratë për gazetarët.
Rusia kërkon që Ukraina të tërhiqet nga pjesët e rajonit lindor të Donetskut që ende nuk janë pushtuar nga trupat ruse, duke synuar kontroll të plotë mbi Donbasin, që përfshin rajonet e Donetskut dhe Luhanskut. Nga ana tjetër, Kievi insiston që luftimet të ndalen në linjat aktuale të frontit.
Shtetet e Bashkuara, në përpjekje për kompromis, kanë propozuar krijimin e një zone të lirë ekonomike, nëse Ukraina tërhiqet nga disa zona. Megjithatë, ende nuk është e qartë se si do të funksiononte kjo zgjidhje në praktikë. Zelenskiy theksoi se çdo kompromis territorial duhet të miratohet nga populli ukrainas, përmes një referendumi të mundshëm.
Ndërkohë, centrali bërthamor i Zaporizhzhias, më i madhi në Evropë, vazhdon të mbetet një pikë kritike, pasi ndodhet pranë vijës së frontit dhe aktualisht kontrollohet nga forcat ruse.
Zelenskiy tha se takimi me Trump synon të “përsosë detajet” e drafteve ekzistuese dhe të diskutojë edhe marrëveshje të mundshme ekonomike për Ukrainën. Ai shtoi se një marrëveshje për garancitë e sigurisë mes Ukrainës dhe SHBA-së është pothuajse gati, ndërsa plani i paqes me 20 pika është përfunduar rreth 90 për qind.
Ukraina po kërkon garanci të forta dhe ligjërisht të detyrueshme, duke qenë e kujdesshme pas përvojave të mëparshme me garanci të dështuara nga aleatët.
Nga ana tjetër, Kremlini ka bërë të ditur se po i shqyrton propozimet amerikane, por ka shmangur komentet publike për të mos dëmtuar negociatat. Mediat ruse raportojnë se presidenti Vladimir Putin mund të jetë i hapur për shkëmbim territoresh, por vetëm nëse Rusia merr kontroll të plotë të Donbasit.
Ndërkohë që bisedimet vazhdojnë, Rusia ka intensifikuar sulmet ndaj infrastrukturës energjetike të Ukrainës dhe ka rritur goditjet në rajonin e Odesës dhe Kharkivit, ku raportohet për viktima civile.
Zelenskiy bëri të ditur se në takimin me Trump do të kërkojë edhe rritje të presionit ndërkombëtar ndaj Rusisë, për ta detyruar atë të hyjë në një marrëveshje reale paqeje.
