Kufizimet kushtetuese të pasluftës, të krijuara për të shmangur përsëritjen e abuzimeve të ushtrisë gjatë regjimit nazist, po e bëjnë Gjermaninë më të ndjeshme ndaj kërcënimeve të reja, përfshirë sulmet e mundshme me dronë nga Rusia. Bundeswehri, ushtria gjermane, nuk ka autoritet të plotë për të qëlluar dronë që hyjnë në hapësirën ajrore të vendit, përveçse mbi bazat ushtarake.
Kushtetuta gjermane, e miratuar në vitin 1949 pas Luftës së Dytë Botërore, ndalon përfshirjen e ushtrisë në çështje të sigurisë së brendshme. Hartuesit e saj kishin për qëllim të shmangnin përsëritjen e mënyrës se si nazistët kishin përdorur forcat ushtarake për të shtypur kundërshtarët politikë, veçanërisht të majtët.
Sot, megjithatë, këto kufizime po krijojnë sfida të reja. Ndërsa Rusia intensifikon testimet ndaj Evropës përmes fluturimeve të dyshimta me dronë, Gjermania gjendet me duar të lidhura përballë provokimeve të Kremlinit. “Duhet të ndryshojmë ligjet në mënyrë që ata që kanë aftësitë për t’u marrë me këto kërcënime – Bundeswehri – të kenë edhe autoritetin ta bëjnë,” deklaroi për POLITICO Thomas Röwekamp, kryetar i Komitetit të Mbrojtjes në Bundestag dhe anëtar i bllokut konservator të kancelarit Friedrich Merz.
Ekspertët ligjorë theksojnë se vetëm një pushtim i drejtpërdrejtë apo një kërcënim serioz do t’i jepte Bundeswehrit të drejtën ligjore të veprimit të brendshëm. Ndërkohë, policia gjermane, megjithëse ka autorizim për të rrëzuar dronë nëse paraqesin rrezik, nuk ka kapacitete teknike për ta bërë këtë. “As policia federale dhe as shumica e forcave policore shtetërore nuk kanë ende aftësi për mbrojtje nga dronët,” pranoi Röwekamp.
Rastet e fundit të dronëve të pashpjeguar mbi objekte të kompanive strategjike, si Rheinmetall dhe BASF, kanë rritur shqetësimet për spiunazh rus. Sipas autoriteteve, edhe pse nuk ka prova se dronët kanë mbajtur armë, qëllimi i tyre duket të ketë qenë mbledhja e të dhënave.
Për t’iu përgjigjur situatës, ministri i Brendshëm gjerman Alexander Dobrindt ka propozuar krijimin e një njësie të posaçme për mbrojtje nga dronët brenda policisë federale dhe ngritjen e një qendre kombëtare që do të bashkërendonte policinë, ushtrinë dhe shërbimet e inteligjencës. Ai gjithashtu planifikon një ligj që do t’i lejonte Bundeswehrit të rrëzonte dronë nëse jetët e qytetarëve rrezikohen.
Megjithatë, kjo nismë përballet me pengesë kushtetuese. “Nëse ligji i ri shkon përtej ‘ndihmës administrative’ të ushtrisë, ai do të përfundojë në Gjykatën Kushtetuese,” paralajmëroi eurodeputetja Marie-Agnes Strack-Zimmermann, kryetare e Komitetit për Siguri dhe Mbrojtje në Parlamentin Evropian.
Qeveria e kancelarit Merz përballet me vështirësi për të ndryshuar kushtetutën, pasi mungon shumica prej dy të tretash e nevojshme në Bundestag. Pa një reformë të tillë, Gjermania mund të mbetet e ekspozuar ndaj provokimeve me dronë për një kohë të gjatë.
“Bota ka ndryshuar – nuk ekziston më një ndarje e qartë midis sigurisë së brendshme dhe asaj të jashtme,” theksoi Röwekamp. “Ne duhet t’i përshtatim dispozitat tona kushtetuese me realitetin e ri.”
Burimi: Politico.
