Presidenti amerikan Donald Trump ka urdhëruar vendosjen e 2,000 pjesëtarëve të Gardës Kombëtare në qytetin e Los Anxhelosit, pas përshkallëzimit të protestave dhe shpërthimit të dhunës gjatë demonstratave kundër arrestimeve masive të emigrantëve të paligjshëm nga Shërbimi i Imigracionit dhe Doganave (ICE).
Trazirat, të cilat nisën të shtunën, përfshinë përplasje mes protestuesve dhe forcave të rendit në lagjen Paramount, një zonë e njohur për komunitetin latino. Protestuesit kundërshtuan përpjekjet e ICE për të ndaluar emigrantë, duke hedhur sende drejt policisë dhe duke bllokuar një autobus të agjentëve. Policia u përgjigj me gaz lotsjellës dhe granata ndriçuese për shpërndarjen e turmës. Më shumë se 40 persona janë arrestuar për pengim të operacioneve federale.
Në një deklaratë në platformën X, zëvendësdrejtori i FBI-së, Dan Bongino, paralajmëroi për masa të ashpra ndaj dhunës:
“Ju sillni kaos, ne sjellim prangat. Do të ketë edhe shumë arrestime. Po analizojmë pamjet filmike për të identifikuar autorët.”
Zëdhënësja e Shtëpisë së Bardhë, Caroline Leavitt, kritikoi ashpër autoritetet lokale të Kalifornisë, duke i quajtur “të paafta” për të ruajtur rendin dhe për të bashkëpunuar me strukturat federale.
Guvernatori demokrat i Kalifornisë, Gavin Newsom, reagoi menjëherë, duke e cilësuar vendimin e presidentit Trump si “qëllimisht provokues” dhe paralajmëroi pasoja të mëdha në marrëdhëniet mes shtetit të Kalifornisë dhe qeverisë federale.
Prania e agjentëve të ICE u vu re mëngjesin e së shtunës pranë një dyqani “Home Depot”, ku zakonisht mblidhen punëtorë të përkohshëm. Ende nuk është konfirmuar nëse agjentët ndodheshin aty për arrestime specifike apo si pjesë e një operacioni më të gjerë për përgatitje taktike.
Pamje televizive të marra më vonë treguan rrugë të mbushura me mbeturina, karroca të përmbysura dhe protestues që dogjën një flamur amerikan – një akt që ka nxitur reagime të ashpra në rrjetet sociale.
Ndërkohë, Sekretari amerikan i Mbrojtjes, Pete Hegseth, paralajmëroi një përgjigje edhe më të ashpër nëse situata del jashtë kontrollit:
“Nëse dhuna vazhdon, marinsat nga baza Pendleton do të aktivizohen gjithashtu. Ata janë në gatishmëri të lartë për të ruajtur rendin.”
Incidentet e fundit vijnë në vazhdën e një operacioni kombëtar të nisur nga administrata Trump kundër emigracionit të paligjshëm. Pamjet e shpërndara nga kreu i Patrullës Kufitare, Michael Banks, tregojnë qartë përballjen e dhjetëra agjentëve të armatosur me uniforma taktike kundër protestuesve. Këshilltari i lartë i Trumpit, Stephen Miller, i quajti këto protesta:
“Një kryengritje kundër rendit ligjor dhe sovranitetit të SHBA-së.”
Ngjarjet në Los Anxhelos kanë nxitur polemika të mëdha në nivel kombëtar dhe ndërkombëtar, duke rindezur debatin për politikën e emigracionit dhe përdorimin e forcës nga autoritetet federale në territoret shtetërore.
