Mitrovicë, 10 nëntor 2025 – Procesi zgjedhor në Mitrovicë ka shkaktuar debat të ashpër politik pas akuzave për manipulim të rezultateve. Zyrtari opozitar Artan Behrami ka reaguar publikisht duke e akuzuar kryeministrin Albin Kurti për, siç tha ai, “fabrikim shtetëror të rezultatit” në këtë komunë.
Behrami, përmes një reagimi në rrjete sociale, ka theksuar se zgjedhjet lokale në Mitrovicë janë shndërruar në “reflektim të urrejtjes dhe përçarjes” që, sipas tij, ka mbjellë qeveria aktuale.
“Në këto pesë vjet, Kurti e ka suspenduar logjikën dhe e ka zëvendësuar me inat, përçarje e urrejtje. Zgjedhjet lokale janë reflektim i kësaj urrejtjeje që ka ndjellë,” ka shkruar Behrami.
Ai pretendon se në Mitrovicë janë përdorur të gjitha mjetet shtetërore, madje edhe grupe të nëntokës, për të fabrikuar një fitore të rreme.
“Në Mitrovicë nuk ka pasur tren bullgar, aty ka pasur tren qeveritar,” ka shtuar Behrami, duke paralajmëruar se ky rast mund të shndërrohet në “skandalin më të madh zgjedhor në historinë e Kosovës së pasluftës.”
Sipas tij, në disa vendvotime janë gjetur fletëvotime me numra serikë të çrregullt dhe të përzier ndërmjet klasave, çka ai e konsideron si dëshmi për trafikim votash dhe ndërhyrje sistematike në procesin zgjedhor.
Behrami u ka bërë thirrje vëzhguesve ndërkombëtarë, organizata joqeveritare dhe mediave që të monitorojnë me kujdes procesin e numërimit në Qendrën e Numërimit dhe Rezultateve (QNR) në Mitrovicë.
Ende nuk ka reagim zyrtar nga Komisioni Qendror i Zgjedhjeve apo zyrtarët qeveritarë lidhur me këto akuza.
