Kina shfaqi fuqinë e saj ushtarake dhe thellimin e raporteve me Rusinë gjatë një parade madhështore ushtarake në Sheshin Tiananmen, e cila synoi të konfirmojë statusin e presidentit kinez, Xi Jinping, si udhëheqës i një rendi alternativ botëror, përtej Perëndimit.
Parada 70-minutëshe përfshiu mbi 10 mijë trupa të organizuara me koreografi të lartë dhe qindra pajisje ushtarake. Një nga momentet më të rëndësishme ishte shfaqja e Xisë krah për krah me presidentin rus Vladimir Putin dhe liderin e Koresë së Veriut, Kim Jong Un – një demonstrim i paprecedent i solidaritetit politik dhe ushtarak.
Në fjalimin e tij, Xi Jinping deklaroi se “Kina është e pandalshme” dhe se “ringjallja e madhe e kombit kinez nuk do të ndalet kurrë”. Ai theksoi se Kina nuk frikësohet nga asnjë “ngacmues” – një term që Pekini përdor shpesh për t’iu referuar SHBA-së.
Xi gjithashtu theksoi se “njerëzimi sot përballet me zgjedhjen mes paqes dhe luftës, dialogut ose konfrontimit, fitores së përbashkët ose humbjes së përbashkët”, duke e paraqitur veten dhe Kinën në “anën e duhur të historisë”.
Një mesazh për Perëndimin
Parada u shoqërua me një numër ngjarjesh diplomatike, përfshirë samitin e Organizatës për Bashkëpunim të Shangait (SCO), që synuan ta paraqesin Kinën si forcë udhëheqëse globale dhe si kundërpeshë ndaj dominimit të SHBA-së.
Sipas analistëve, ngjarja nuk ishte thjesht një shfaqje ceremoniale, por “një akt i organizuar me kujdes i komunikimit strategjik”, duke ndërthurur forcën ushtarake, mesazhet diplomatike dhe narrativën historike të Kinës.
Reagimi i Trump
Nga ana tjetër, ish-presidenti amerikan Donald Trump e përdori platformën Truth Social për të uruar Kinën për përvjetorin e Luftës së Dytë Botërore, por edhe për të akuzuar Xi, Putinin dhe Kimin se po bashkëpunojnë kundër SHBA-së.
“Pyetja e madhe është nëse Xi do të përmendë gjakun dhe mbështetjen masive që SHBA i dha Kinës gjatë Luftës së Dytë Botërore”, shkroi Trump, duke shtuar me ironi: “Përcillni përshëndetjet e mia të ngrohta për Vladimir Putinin dhe Kim Jong Unin, që po punojnë kundër SHBA-së.”
Raportet mes Moskës dhe Pekinit po thellohen gjithnjë e më shumë, me Kinën që ofron mbështetje indirekte për luftën e Rusisë në Ukrainë, ndërsa mijëra trupa koreano-veriore raportohen se janë dërguar në frontin rus.
Një demonstrim fuqie dhe aleancash të reja
Parada ushtarake dhe prania e liderëve të fuqive të sfiduara nga Perëndimi i dhanë Xisë mundësinë ta paraqesë veten si udhëheqës global, Putinit shansin të tregojë se nuk është i izoluar dhe Kimit rolin e aleatit strategjik.
Ky koordinim, sipas analistëve, është një paralajmërim i qartë për rivalët perëndimorë dhe një përpjekje për të ndërtuar një rend botëror alternativ.
