Një ngjarje e jashtëzakonshme ka tronditur futbollin anglez pak ditë më parë, ku mbrojtësi i AFC Wimbledon, Sam Hutchinson, ka pësuar një atak kardiak gjatë ndeshjes, por ka vazhduar të luajë dhe ka shënuar golin e fitores për skuadrën e tij.
Ngjarja ka ndodhur gjatë sfidës ndaj Grimsby në kuadër të League Two – kategoria e katërt e futbollit anglez. Vetëm në minutën e 6-të të ndeshjes, 35-vjeçari Hutchinson nisi të ndjente dhimbje të forta në gjoks, por duke mos kuptuar seriozitetin e situatës, ai vendosi të qëndrojë në fushë.
Me kalimin e minutave, ai jo vetëm që përfundoi ndeshjen, por shënoi golin e vetëm, duke i siguruar fitoren 1-0 Wimbledon-it dhe duke e kualifikuar skuadrën në play-off për ngjitje në League One.
Në një rrëfim për mediat britanike, Hutchinson tregon momentet dramatike:
“Ishte çmenduri. Gjatë lojës ndjeja shumë dhimbje, por adrenalina më mbajti në fushë. Pas ndeshjes, gruaja më tha se nuk duka mirë në intervistën pas ndeshjes. Në kthim për në Nottingham, dhimbjet u përkeqësuan. Mjeku më çoi menjëherë në spital dhe atje mësova se praktikisht kisha kaluar një infrakt”.
Për fat të mirë, pas trajtimit të menjëhershëm, mjekët i dhanë lajmin e mirë: ai mund të vazhdojë karrierën sportive, pasi gjendja e tij është stabilizuar dhe nuk ka pasoja afatgjata.
Ngjarja ka tronditur opinionin sportiv, duke u konsideruar si një prej momenteve më të pazakonta në historinë moderne të futbollit britanik – një shembull i jashtëzakonshëm i kurajos dhe sakrificës, por edhe një alarm për kujdesin shëndetësor në sportin profesionist.
