Një vendim i rëndësishëm i Bashkimit Evropian për të gjobitur gjigantin teknologjik amerikan Google për praktikat e tij të reklamave në kërkim u ndalua në momentin e fundit nga Komisioneri i Tregtisë i BE-së, Maroš Šefčovič, për shkak të kërcënimeve të vazhdueshme tarifore nga Presidenti i SHBA-së, Donald Trump. Ky veprim u bë kundër dëshirës së Komisioneres së Konkurrencës, Teresa Ribera, duke shkaktuar debat të gjerë për ndikimin e politikës globale në vendimet antitrust të BE-së.
Sipas burimeve të cituara nga POLITICO, Google u njoftua javën e kaluar se pritej një vendim të hënën për hetimin katërvjeçar të BE-së mbi praktikat e tij të teknologjisë reklamuese (Adtech), i cili prek thelbin e modelit të biznesit të kompanisë për vendosjen e reklamave online. Megjithatë, Shefcovic ndërhyri për të pezulluar vendimin, një lëvizje e pazakontë që nxjerr në pah tensionet mes Brukselit dhe Uashingtonit, raportoi MLex.
Kjo ndërhyrje vjen në një kohë kur frika në Evropë po rritet për shkak të presionit të shtuar të Trump, i cili ka kërcënuar me “tarifa shtesë të konsiderueshme” dhe kufizime në eksportin e teknologjisë dhe çipave drejt vendeve që ai i konsideron si diskriminuese ndaj kompanive amerikane. Në korrik, Trump arriti një marrëveshje tregtare të njëanshme, duke shtuar tensionet me BE-në.
Komisioni i BE-së kishte shprehur dy vjet më parë pikëpamjen paraprake se Google ka shkelur rregullat e antitrustit duke shtrembëruar konkurrencën në industrinë e teknologjisë së reklamave. Kjo çështje ka marrë vëmendje të madhe që kur Departamenti i Drejtësisë i SHBA-së propozoi shpërbërjen e Google në fillim të këtij viti. Megjithatë, vendimet antitrust të BE-së kërkojnë miratimin e të gjithë Kolegjit të Komisionerëve, dhe ndërhyrja e Shefcovic, i cili është më poshtë në hierarkinë ekzekutive, konsiderohet e pazakontë.
Një zëdhënës i Komisionit refuzoi të japë detaje, duke u shprehur se “hetimi është duke vazhduar dhe do të përfundojë kur vendimi të miratohet zyrtarisht.” Ribera, nga ana tjetër, konfirmoi se marrëdhëniet me Departamentin e Drejtësisë të SHBA-së mbeten të mira, por nuk dha hollësi të mëtejshme.
Ky zhvillim nxjerr në pah betejën e vazhdueshme mes rregullatorëve evropianë dhe gjigantëve teknologjikë amerikanë, ndërsa kërcënimet e Trump për tarifa shtesë rrezikojnë të komplikojnë më tej marrëdhëniet transatlantike. Çfarë do të ndodhë me hetimin ndaj Google dhe si do të ndikojë kjo në tregun global të teknologjisë, mbetet për t’u parë.
