Kremlini ka konfirmuar se Presidenti i SHBA-së, Donald Trump, dhe Presidenti rus, Vladimir Putin, kanë rënë dakord që të takohen në ditët në vijim. Takimi vjen në kohën kur Trump ka shprehur gatishmëri për të ndërmjetësuar një zgjidhje të mundshme të konfliktit në Ukrainë.
Gjatë një deklarate të fundit, Trump tha se kishte “një shans të mirë” për të organizuar një takim personal me liderët e Rusisë dhe Ukrainës, për të diskutuar mundësinë e përfundimit të luftës. Presidenti ukrainas, Volodymyr Zelensky, ka shprehur mbështetje për një samit të tillë, duke theksuar se janë diskutuar formate të ndryshme: bisedime dypalëshe dhe trepalëshe, me pjesëmarrjen e Evropës si palë e rëndësishme.
Megjithatë, Presidenti Putin ka deklaruar se një takim me Zelenskyn “është shumë larg” për shkak të mungesës së kushteve të përshtatshme. Ai ka ritheksuar se do të ishte i gatshëm për një takim vetëm në fazën përfundimtare të negociatave.
Trump ka vendosur një afat që skadon të premten për Rusinë që të pranojë një armëpushim, në të kundërtën do të përballet me sanksione më të rënda nga SHBA.
Vizita e Witkoff në Moskë dhe ndikimi diplomatik
Takimi i mundshëm midis Trump dhe Putin pritet të pasohet nga bisedimet që i dërguari amerikan, Steve Witkoff, ka zhvilluar në Moskë këtë javë. Witkoff, i cili ka vizituar Rusinë katër herë më parë, është takuar me zyrtarë të lartë rusë, ndonëse pa ndonjë përparim konkret deri më tani.
Kremlini e ka quajtur vizitën e fundit të Witkoff “konstruktive”, duke theksuar se janë shkëmbyer “sinjale” mes dy palëve, ndërsa Emiratet e Bashkuara Arabe janë përmendur si një vend potencial për mbajtjen e samitit të Trump dhe Putin, ndoshta që javën e ardhshme.
Skepticizëm dhe sfida në terren
Ndërsa afati i Trumpit për arritjen e një armëpushimi po skadon, Rusia vazhdon sulmet ajrore në shkallë të gjerë ndaj Ukrainës, duke treguar pak shenja të tërheqjes përkundër kërcënimeve për sanksione të reja.
Zelensky ka thënë se Rusia do të nisë të bëjë hapa seriozë drejt paqes vetëm nëse përballet me vështirësi financiare. Në të njëjtën kohë, SHBA-të kanë miratuar një ndihmë shtesë ushtarake prej 200 milionë dollarësh për Ukrainën, e cila përfshin mbështetje për prodhimin e dronëve.
Kërkesat e Rusisë – barriera për bisedime të suksesshme
Kushtet e vendosura nga Moska për paqe mbeten të papranueshme për Kievin dhe aleatët perëndimorë. Ato përfshijnë:
-
Neutralitetin e Ukrainës dhe braktisjen e aspiratave për NATO;
-
Tërheqjen e trupave ukrainase nga katër rajonet pjesërisht të pushtuara në juglindje;
-
Njohjen ndërkombëtare të rajoneve të aneksuara dhe të Krimesë;
-
Reduktimin e forcave të armatosura të Ukrainës;
-
Një status zyrtar për gjuhën ruse;
-
Dhe heqjen e sanksioneve ndërkombëtare ndaj Rusisë.
Një fund i afërt i luftës?
Trump, që më parë kishte deklaruar se do t’i jepte fund luftës “brenda një dite” pas marrjes së detyrës, tani po përdor një ton më të kujdesshëm, duke theksuar nevojën për “punë të gjatë dhe të vështirë” për paqen.
Ndërkohë, Zelensky ka përsëritur qëndrimin e tij se Ukraina “nuk ka frikë nga takimet” dhe pret “të njëjtën guxim” nga pala ruse.
Pavarësisht përpjekjeve të diplomacisë ndërkombëtare dhe raundeve të dështuara të negociatave në Stamboll, konflikti vijon në vitin e katërt të tij, pa shenja të qarta për një zgjidhje të afërt.
