Presidenti i Shteteve të Bashkuara të Amerikës, Donald Trump, ka deklaruar se është i gatshëm të zhvillojë bisedime me udhëheqësit e rinj të Iranit, pasi sipas tij ata kanë shprehur interes për negociata, në ditën e dytë të konfliktit të ri në Lindjen e Mesme.
Trump bëri të ditur se ka pranuar të komunikojë me drejtuesit e rinj iranianë, duke shtuar se zhvillimet e fundit në terren janë duke ecur në favor të operacionit amerikan.
Në një intervistë për CNBC, presidenti amerikan tha se operacioni ushtarak i SHBA-së në Iran po zhvillohet “më shpejt se sa ishte planifikuar” dhe se rezultatet deri tani janë “shumë pozitive”.
“Është një regjim shumë brutal, një nga më brutalët në historinë e njerëzimit. Ne po bëjmë detyrën tonë jo vetëm për ne, por për gjithë botën,” deklaroi Trump.
Ai shtoi se situata në Iran po evoluon në një drejtim që, sipas tij, tregon sukses të operacionit amerikan.
Ndërkohë, në një intervistë për Fox News, Trump pretendoi se gjatë një sulmi të vetëm janë vrarë 48 liderë iranianë të nivelit të lartë.
“Askush nuk mund ta besojë suksesin që kemi arritur. 48 liderë iranianë u shuan me një goditje të vetme,” u shpreh presidenti amerikan.
Deklaratat e Trump vijnë në një moment kur tensionet në Lindjen e Mesme mbeten të larta, ndërsa zhvillimet në Iran dhe reagimet ndërkombëtare po ndiqen me vëmendje nga komuniteti ndërkombëtar.
