Presidenti i Shteteve të Bashkuara, Donald Trump, ka ashpërsuar qëndrimin ndaj Rusisë, duke paralajmëruar masa të reja të rënda ekonomike nëse Moska nuk arrin një marrëveshje paqeje me Ukrainën brenda 10 deri në 12 ditëve të ardhshme.
Kërcënimi erdhi gjatë një konference për shtyp nga resorti i golfit në Turnberry të Skocisë, ku Trump ndodhej në shoqërinë e kryeministrit britanik, Keir Starmer. Ai deklaroi se afati i mëparshëm prej 50 ditësh ishte i tepërt dhe se nuk sheh arsye për vonesa të mëtejshme.
“Po, do të caktoj një afat të ri, rreth 10 ose 12 ditë nga sot. Nuk ka arsye për të pritur më gjatë. Dua të jem bujar, por nuk po shohim asnjë përparim,” tha Trump para gazetarëve.
Në rast të mosarritjes së një marrëveshjeje, presidenti amerikan paralajmëroi vendosjen e tarifave të larta mbi eksportet ruse, si dhe ndëshkime për ato vende që vazhdojnë të importojnë naftë nga Rusia.
Sipas analizës së CNN, mbetet e paqartë pse Trump vendosi t’i japë Rusisë edhe disa ditë shtesë, në vend që të zbatojë menjëherë masat e përfolura. Megjithatë, ekspertët vërejnë një ndryshim të dukshëm në tonin dhe qëndrimin e tij ndaj Kremlinit.
“Nuk ishte hera e parë që menduam se e kishim zgjidhur, por pastaj presidenti Putin fillon të lëshojë raketa mbi qytete si Kievi dhe vret njerëz të pafajshëm nëpër azile ose kudo tjetër,” u shpreh Trump.
Kjo qasje më e ashpër ndaj Rusisë vjen në një kohë kur konflikti në Ukrainë vazhdon të përshkallëzohet dhe komuniteti ndërkombëtar kërkon zgjidhje afatgjata për paqe në rajon.
