Presidenti amerikan Donald Trump ka shpërthyer ndaj Kinës, duke e akuzuar për “akte armiqësore” dhe paralajmëruar një “rritje masive të tarifave doganore” ndaj produkteve kineze që hyjnë në Shtetet e Bashkuara.
“Po shqyrtoj një rritje të madhe të tarifave për mallrat kineze. Duhej të takohesha me presidentin Xi pas dy javësh, në samitin APEC në Korenë e Jugut, por tani nuk shoh më arsye për ta bërë këtë”, shkroi Trump në rrjetin e tij social Truth Social.
Deklarata e tij erdhi vetëm një ditë pasi Kina njoftoi kufizime të reja për eksportet e materialeve që përmbajnë elemente të tokave të rralla. Pekini sqaroi se licencat për produktet që lidhen me prodhimin e çipave do të jepen vetëm pas analizimit të çdo rasti veçmas, një lëvizje që është parë si përshkallëzim i tensioneve tregtare mes dy superfuqive.
Tregjet amerikane reagojnë me rënie
Pas kërcënimeve të Trump, Wall Street pësoi humbje të menjëhershme: indeksi Dow Jones ra me 0,70% duke zbritur në 46.045,79 pikë, Nasdaq humbi 1,09% në 22.781,74 pikë, ndërsa S&P 500 u ul me 0,84%, duke mbyllur ditën në 6.678,48 pikë.
Akuzat ndaj Pekinit
“Po ndodhin gjëra të çuditshme në Kinë. Ata po bëhen gjithnjë e më armiqësorë dhe po dërgojnë letra vendeve në mbarë botën, duke njoftuar kontrolle eksporti për çdo element që lidhet me tokat e rralla – madje edhe për produkte që nuk prodhohen në Kinë”, shkroi Trump.
Sipas tij, një veprim i tillë “do të bllokonte tregjet ndërkombëtare dhe do ta bënte jetën të vështirë për shumë shtete, përfshirë vetë Kinën”.
Tensionet tregtare në rritje
Trump e quajti këtë lëvizje “të papërshtatshme” dhe aludoi për një përputhje kohore të dyshimtë me zhvillimet në Lindjen e Mesme:
“Këto letra u dërguan pikërisht në ditët kur, pas tre mijë vitesh kaosi dhe luftërash, po vendoset paqja në Lindjen e Mesme. Më pyes veten nëse është rastësi”, shkroi ai.
Presidenti shtoi se Shtetet e Bashkuara janë kontaktuar nga vende që “janë jashtëzakonisht të zemëruara” me sjelljen tregtare të Kinës dhe paralajmëroi kundërmasa ekonomike.
“Si president i Shteteve të Bashkuara, do ta kundërshtoj financiarisht këtë veprim. Po shqyrtojmë edhe masa të tjera të forta në përgjigje”, përfundoi Trump.
Burimi: Corriere della Sera
