Presidenti i Shteteve të Bashkuara, Donald Trump, ka bërë një deklaratë të pazakontë duke pranuar publikisht se CIA po kryen operacione të fshehta brenda Venezuelës. Kjo është hera e rrallë që një udhëheqës amerikan konfirmon aktivitete të tilla të agjencisë së inteligjencës.
Në një prononcim nga Shtëpia e Bardhë, Trump tha se ka autorizuar personalisht CIA-n për veprime në territorin venezuelian. Ai shtoi se ky vendim është marrë për dy arsye kryesore: “Së pari, sepse Venezuela i ka zbrazur burgjet e saj në Shtetet e Bashkuara të Amerikës. Dhe së dyti, për shkak të drogës — shumë nga droga që vjen në SHBA është venezueliane dhe transportohet përmes detit.”
Trump theksoi se administrata e tij “po shqyrton terrenin” për ndërhyrje të mëtejshme në rajon, por nuk pranoi të thotë nëse CIA ka mandat të drejtpërdrejtë për të vepruar kundër Presidentit Nicolás Maduro.
Deklarata e tij vjen pas raportimit të The New York Times, ku thuhej se CIA ishte autorizuar për të ndërmarrë veprime të fshehta në Venezuelë. Në të njëjtën kohë, ushtria amerikane ka kryer sulme ajrore dhe detare kundër anijeve të dyshuara për kontrabandë droge në Karaibe, duke shkatërruar të paktën pesë anije dhe vrarë 27 persona që nga fillimi i shtatorit — katër prej tyre me origjinë venezueliane.
Reagimi i ashpër i Maduros: “Jo luftë, po paqe”
Presidenti i Venezuelës, Nicolás Maduro, reagoi menjëherë, duke e quajtur deklaratën e Trumpit “luftarake dhe të rrezikshme”. Në një fjalim televiziv gjatë mbledhjes së Këshillit Kombëtar për Sovranitet dhe Paqe, ai i bëri thirrje Uashingtonit të ndalojë ndërhyrjet ushtarake:
“Jo luftë, po paqe. Për popullin e Shteteve të Bashkuara, ju lutem — jo luftë, por paqe.”
Maduro gjithashtu akuzoi CIA-n për ndërhyrje historike në Amerikën Latine, duke përmendur përmbysjet ushtarake në Afganistan, Irak, Libi dhe Kili, si dhe mijëra persona të zhdukur gjatë diktaturave ushtarake në rajon.
“Sa gjatë do të vazhdojë CIA me grushtet e saj të shtetit? Amerika Latine nuk i do ato, nuk ka nevojë për to dhe i refuzon ato,” tha Maduro.
Reagimi i diplomacisë venezueliane dhe përplasja në Kongresin amerikan
Ministria e Jashtme e Venezuelës lëshoi një deklaratë zyrtare ku dënoi publikisht fjalët e Trumpit, duke i cilësuar si “një shkelje të rëndë të së drejtës ndërkombëtare dhe Kartës së Kombeve të Bashkuara”.
“Deklaratat e Presidentit të SHBA përbëjnë një precedent të rrezikshëm dhe një kërcënim për paqen dhe stabilitetin në Venezuelë,” thuhej në komunikatën e nënshkruar nga ministri i Jashtëm Yván Gil, e publikuar në kanalin Telegram të tij.
Ndërkohë, në Kongresin amerikan ka shpërthyer debat i ashpër. Ligjvënës nga të dy partitë kryesore kanë kritikuar administratën Trump, duke e akuzuar për veprime ushtarake pa miratimin e Kongresit dhe për mungesë transparence.
Sipas burimeve të CNN dhe The Washington Post, administrata amerikane nuk ka dorëzuar ende prova konkrete që anijet e shkatërruara transportonin drogë.
