Presidenti i SHBA-së, Donald Trump, ka lënë të hapur mundësinë e ndërmarrjes së hapave ekstremë ndaj Groenlandës, duke rritur tensionet me Evropën dhe aleatët e NATO-s, pak para udhëtimit të tij drejt Forumit Ekonomik Botëror në Davos.
Gjatë një paraqitjeje të papritur në sallën e konferencave të Shtëpisë së Bardhë të martën, Trump u pyet se sa larg ishte i gatshëm të shkonte për të marrë kontrollin e Groenlandës. Përgjigjja e tij ishte e shkurtër dhe e paqartë: “Do ta zbuloni”.
Presidenti amerikan deklaroi se është i bindur se NATO dhe SHBA-të “do të gjejnë një zgjidhje që do t’i kënaqë të gjitha palët”, pa dhënë detaje konkrete. Ai shtoi se ka të planifikuara disa takime lidhur me Groenlandën gjatë pjesëmarrjes në Forumi Ekonomik Botëror, duke shprehur optimizëm se “gjërat do të shkojnë mjaft mirë”.
Komentet e Trump vijnë pavarësisht qëndrimit të fortë të udhëheqësve evropianë, të cilët ditët e fundit kanë riafirmuar mbështetjen për sovranitetin danez mbi Groenlanda. Gjatë fundjavës, Trump kërcënoi gjithashtu me vendosjen e tarifave të reja ndaj vendeve evropiane, përfshirë Britaninë e Madhe, Francën dhe Gjermaninë, të cilat kanë dërguar trupa në Groenlandë në shenjë solidariteti.
Ai minimizoi shqetësimet se këto qëndrime mund të rrezikojnë marrëveshjen e vitit të kaluar me Bashkimin Evropian për rritjen e investimeve në SHBA, duke deklaruar se “ata kanë shumë nevojë për atë marrëveshje me ne”.
Nga ana tjetër, presidentja e Komisionit Evropian, Ursula von der Leyen, reagoi nga Davosi, duke paralajmëruar se çdo përgjigje e BE-së ndaj masave amerikane do të jetë “e palëkundur, e bashkuar dhe proporcionale”.
Trump ka argumentuar se SHBA-të kanë nevojë për Groenlandën për arsye strategjike sigurie, duke përmendur kërcënimet e mundshme nga Kina dhe Rusia. Megjithatë, këmbëngulja e tij se vetëm pronësia amerikane është e pranueshme po vë në provë strategjinë më të butë që disa liderë evropianë kanë ndjekur ndaj tij që nga rikthimi në detyrë.
Ndërkohë, udhëtimi i Trump drejt Zvicrës u ndërpre përkohësisht, pasi avioni presidencial Air Force One u kthye në Bazën e Përbashkët Andrews rreth një orë pas ngritjes. Sipas zëdhënëses së Shtëpisë së Bardhë, Karoline Leavitt, ekuipazhi konstatoi “një problem të vogël elektrik” dhe, për arsye sigurie, vendosi kthimin e avionit.
Trump pritet të vazhdojë udhëtimin drejt Davosit me një avion tjetër për të marrë pjesë në Forumin Ekonomik Botëror.
