Presidenti ukrainas, Volodymyr Zelensky, ka kërkuar nga Donald Trump armë me rreze të gjatë veprimi, përfshirë raketat Tomahawk me kapacitet deri në 2.500 km. Sipas burimeve amerikane, Trump është “gati të heqë veton” mbi këtë kategori armësh, duke hapur mundësinë e përdorimit të tyre si një mjet presioni mbi Kremlinin.
Takimi mes dy presidentëve u zhvillua gjatë Asamblesë së Përgjithshme të OKB-së, ku Zelensky theksoi: “Na duhen këto armë, por kjo nuk do të thotë që do t’i përdorim. Është një presion i mëtejshëm mbi Putinin që të ulet në tryezë.”
Kievi prej dy vitesh kërkon një mjet frenues për të ndalur sulmet ruse ndaj qyteteve dhe industrive ukrainase. Deri tani, Ukraina ka përdorur dronë dhe raketa lundrimi vendase si Neptune dhe Flamingo, të afta për të goditur objektiva deri në 500 km larg, por me kapacitet të kufizuar eksplozivi.
Tomahawk, një nga armët më të fuqishme të arsenalit amerikan, mund të arrijë deri në 2.500 km dhe të mbajë 450 kg eksploziv plastik. Për dekada, këto raketa kanë shërbyer si “dora e gjatë” e Shteteve të Bashkuara në kundërsulm, nga Iraku te Serbia, Afganistani e Siria. Përdorimi i tyre nga Ukraina do të përfaqësonte një përshkallëzim të ndjeshëm të konfliktit, duke ekspozuar Moskën ndaj sulmeve shumë më të fuqishme se ato të dronëve aktualë.
Që nga fundi i korrikut, sulmet ukrainase janë përqendruar tek rafineritë e naftës ruse, duke shkaktuar dëme në 17 impiante, tubacione dhe stacione pompimi, dhe duke bllokuar rreth një të pestën e prodhimit. Kjo ka ulur eksportet e naftës, burimin kryesor financiar të Rusisë, dhe ka filluar të ndikojë edhe në furnizimin e qytetarëve në Moskë dhe Shën Petersburg.
Ekspertët paralajmërojnë se dërgimi i raketave Tomahawk në Ukrainë mund të ndryshojë ndjeshëm dinamikën e luftës dhe të shtyjë Moskën drejt negociatave, sipas qeverisë ukrainase.
