Presidenti i SHBA-së, Donald Trump, mund të zhvillojë një takim personal me Presidentin rus, Vladimir Putin, javën e ardhshme, në përpjekje për të ndërmjetësuar një përfundim të luftës Rusi-Ukrainë. Këtë e ka bërë të ditur një zyrtar i Shtëpisë së Bardhë të mërkurën.
Sipas burimeve të Associated Press, ndonëse takimi ende nuk është planifikuar zyrtarisht dhe nuk është caktuar ndonjë vendtakim, përgatitjet për një samit të tillë janë duke u shqyrtuar. Zyrtari amerikan, i cili kërkoi të mbetet anonim për shkak të natyrës së ndjeshme të diskutimeve, konfirmoi se bisedimet për një takim janë në zhvillim e sipër.
Lajmi u publikua fillimisht nga “The New York Times”, vetëm pak orë pasi i dërguari special i Trump-it, Steve Witkoff, zhvilloi një takim në Moskë me Presidentin Putin. Vetë Trump njoftoi në rrjetin Truth Social se Witkoff kishte pasur një “takim shumë produktiv” me udhëheqësin rus, ku sipas tij është arritur “përparim i madh”.
Sipas Trump, pas këtij takimi, janë informuar edhe aleatët evropianë të SHBA-së, të cilët thuhet se do të bashkëpunojnë në përpjekjet për t’i dhënë fund konfliktit në Ukrainë “gjatë ditëve dhe javëve në vijim”.
Sekretarja e shtypit e Shtëpisë së Bardhë, Karoline Leavitt, deklaroi se “Rusët shprehën gatishmërinë për të takuar Presidentin Trump dhe ai mbetet i hapur për të zhvilluar takim si me Presidentin Putin, ashtu edhe me Presidentin Zelensky.” Megjithatë, ajo nuk dha detaje rreth afatit apo vendit të mundshëm të zhvillimit të takimit.
Ndërkohë, Kremlini bëri të ditur se takimi midis Putinit dhe Witkoff-it zgjati rreth tre orë. Këshilltari për çështje të jashtme i Putinit, Yuri Ushakov, e cilësoi këtë takim si “një bisedë të dobishme dhe konstruktive”, ku u diskutua kriza në Ukrainë dhe mundësitë për zhvillimin e bashkëpunimit strategjik mes Moskës dhe Uashingtonit.
Takimi vjen vetëm disa ditë përpara afatit të caktuar nga Shtëpia e Bardhë që Rusia të arrijë një marrëveshje paqeje me Ukrainën, në të kundërtën, ajo do të përballet me sanksione të reja ekonomike të ashpra që mund të prekin edhe vendet partnere që importojnë naftë ruse.
