Presidenti amerikan Donald Trump ka ashpërsuar ndjeshëm retorikën ndaj qeverive të majta në Amerikën Latine, duke paralajmëruar rënien e Kubës, duke kërcënuar drejtpërdrejt Kolumbinë dhe duke riafirmuar synimin për aneksimin e Groenlandës.
Komentet u bënë në bordin e Air Force One, gjatë kthimit të tij në Uashington, më pak se 48 orë pas një operacioni të ushtrisë amerikane brenda Karakasit, ku u arrestua dhe u ndalua udhëheqësi venezuelian Nicolás Maduro, së bashku me bashkëshorten e tij.
“Kuba duket sikur është gati të bjerë. Nuk e di nëse do të rezistojnë”, deklaroi Trump, duke shtuar se sipas tij, mbijetesa e regjimit kuban varet drejtpërdrejt nga Venezuela. Ai përjashtoi përdorimin e drejtpërdrejtë të forcave amerikane kundër Havanës, por e bëri të qartë se Uashingtoni pret dhe dëshiron ndryshim regjimi në rajon.
Duke folur për Venezuelën, Trump shmangu sqarimin se kush e kontrollon realisht pushtetin pas arrestimit të Maduros.
“Mos më pyesni kush është në krye, sepse do të jetë e diskutueshme. Ne jemi në krye”, tha ai.
Trump deklaroi se SHBA synon të rindërtojë Venezuelën, veçanërisht sektorin e naftës, përpara organizimit të zgjedhjeve, në mënyrë që qytetarët të zgjedhin udhëheqjen e re. Ai tha se është i gatshëm të bashkëpunojë përkohësisht me Delcy Rodríguez, të cilën e cilësoi si presidente në detyrë, duke theksuar se Uashingtoni pret akses të pakufizuar për forcat amerikane në procesin e rindërtimit.
Megjithatë, paralajmërimi ishte i drejtpërdrejtë:
“Nëse nuk sillen mirë, do të ketë një sulm të dytë”, tha Trump.
Administrata amerikane justifikon operacionin kundër Maduros kryesisht si pjesë të luftës kundër trafikut të drogës. Në këtë linjë, Trump sulmoi ashpër edhe presidentin e Kolumbisë, Gustavo Petro, një kritik i hapur i veprimeve të SHBA-së në Venezuelë.
“Kolumbia është shumë e sëmurë, e drejtuar nga një njeri i sëmurë që prodhon kokainë dhe e dërgon në SHBA. Kjo nuk do të zgjasë shumë”, deklaroi ai.
Në fund, Trump iu rikthye edhe çështjes së Groenlandës, vetëm disa orë pasi kryeministri i Danimarkës kishte kritikuar ashpër kërcënimet e tij. Presidenti amerikan insistoi se SHBA “ka nevojë” për territorin autonom danez.
“Ne kemi nevojë për Groenlandën për arsye të sigurisë kombëtare. Edhe BE-ja ka nevojë që ne ta kemi Groenlandën”, tha Trump.
Deklaratat shënojnë një tjetër përshkallëzim të qartë të politikës së jashtme amerikane, me një qasje gjithnjë e më konfrontuese ndaj Amerikës Latine dhe aleatëve evropianë.
