Presidenti i Shteteve të Bashkuara, Donald Trump, ka ndërmarrë hapat e parë për një rilindje të fuqishme të energjisë bërthamore në vend, duke nënshkruar një seri dekretesh ekzekutive që synojnë përshpejtimin e zhvillimit të reaktorëve të rinj dhe forcimin e zinxhirit të furnizimit me karburant bërthamor.
Ky vendim historik vjen në një moment kur kërkesa për energji në SHBA është rritur për herë të parë në më shumë se 20 vjet – rritje që lidhet ngushtë me bum-in e inteligjencës artificiale. Në ditën e parë të mandatit të tij të ri, Trump shpalli gjendje të jashtëzakonshme energjetike, duke theksuar nevojën për masa të menjëhershme për të garantuar furnizimin energjetik të vendit.
“Me këto veprime, Presidenti Trump i dërgon një mesazh të qartë botës: Amerika do të rindërtohet dhe rilindja bërthamore amerikane do të nisë,” deklaroi Michael Kratsios, drejtor i Zyrës për Politikën Shkencore dhe Teknologjike të Shtëpisë së Bardhë.
Dekretet parashikojnë ristrukturimin e Komisionit Rregullator Bërthamor, rishikimin e stafit dhe udhëzimin e Departamentit të Energjisë dhe Departamentit të Mbrojtjes për ndërtimin e centraleve të reja në toka federale. Sipas një zyrtari të lartë të administratës, baza ushtarake do të jenë ndër objektet e para që do të pajisen me reaktorë të rinj.
Masat përfshijnë gjithashtu rigjallërimin e prodhimit dhe pasurimit të uraniumit brenda SHBA-së, në një përpjekje për të reduktuar varësinë nga importet dhe për të rritur sigurinë energjetike kombëtare.
Historikisht, administrata Trump ka mbështetur fuqishëm përdorimin e karburanteve fosile si nafta, qymyri dhe gazi natyror. Megjithatë, energjia bërthamore po fiton gjithnjë e më shumë terren në diskursin politik amerikan, duke gjetur mbështetje si nga republikanët ashtu edhe nga një pjesë e demokratëve.
Demokratët e shohin energjinë bërthamore si një alternativë të pastër ndaj gazrave serrë, ndërsa republikanët e përkrahin për shkak të potencialit të saj për të garantuar pavarësinë energjetike të vendit.
Sakaq, ambientalistët kanë ngritur shqetësime për çështjet e sigurisë dhe menaxhimin e mbetjeve radioaktive, por duket se për momentin, këto zëra mbeten në sfondin e një plani ambicioz për të rikthyer SHBA-në në qendër të prodhimit të energjisë bërthamore në botë.
