Presidenti i Shteteve të Bashkuara, Donald Trump, deklaroi të martën se Kanadaja mund të përfitojë nga sistemi amerikan i mbrojtjes ajrore të njohur si “Kupola e Artë” pa asnjë kosto, nëse vendi i veriut bashkohet me SHBA-në si shteti i 51-të. Në të kundërt, sipas Trump, Kanadaja do të duhet të paguajë 61 miliardë dollarë për t’u integruar në këtë sistem nëse mbetet një shtet i veçantë.
Në një postim në rrjetin social Truth Social, Trump shkroi:
“I thashë Kanadasë, e cila dëshiron shumë të jetë pjesë e sistemit tonë fantastik ‘Kupola e Artë’, se do t’u kushtojë 61 miliardë dollarë nëse mbeten një komb i veçantë, por do t’u kushtojë ZERO DOLLARË nëse bëhen shteti ynë i 51-të të dashur. Ata po e shqyrtojnë ofertën!”
Këto komente erdhën pak pasi kryeministri kanadez, Mark Carney, deklaroi për kanalin CBC se Kanadaja ka synim të bashkohet me iniciativën evropiane të mbrojtjes ReArm Europe dhe të bëhet pjesë e planit evropian të armatimit deri më 1 korrik. Ky veprim synon të ulë varësinë e Kanadasë nga SHBA për armë dhe municione.
Carney ka mohuar vazhdimisht idetë e Trump për bashkim me SHBA, duke thënë në një takim të fundit në Zyrën Ovale se “Kanadaja nuk është në shitje.”
Javën e kaluar, Trump prezantoi detaje të projektit të tij madhor të mbrojtjes prej 175 miliardë dollarësh, i cili synon të jetë funksional para vitit 2029. Sistemi “Kupola e Artë” do të ketë kapacitetin për të interceptuar dronë dhe raketa kudo në botë, përfshirë edhe nga hapësira.
Iniciativa e “Kupolës së Artë” u lansua menjëherë pas marrjes së detyrës nga Trump në janar dhe do të jetë e modeluar sipas sistemit të mbrojtjes izraelite “Kupola e Hekurt”, por e përshtatur për kushtet amerikane dhe të integruar me infrastrukturën ekzistuese të mbrojtjes në SHBA.
