Presidenti amerikan Donald Trump deklaroi të mërkurën se takimi midis të dërguarve të tij – Steve Witkoff dhe Jared Kushner – dhe presidentit rus Vladimir Putin në Moskë ishte “mjaft i mirë”, por theksoi se ende nuk dihet se cilat do të jenë hapat e ardhshëm në procesin e negociatave për t’i dhënë fund luftës në Ukrainë.
Duke folur nga Zyra Ovale, Trump u shpreh se Rusia po kërkon “shumë fort” një marrëveshje paqeje. Megjithatë, ai shtoi me humorin e tij karakteristik se “duhen dy veta për të kërcyer tango”, duke lënë të kuptohet se çdo progres varet nga vullneti i të dyja palëve.
Takimi në Kremlin u zhvillua të martën, ndërsa më herët një zyrtar i Shtëpisë së Bardhë konfirmoi se Witkoff dhe Kushner e kanë informuar plotësisht presidentin dhe zyrtarët ukrainas lidhur me diskutimet.
Sipas këtij zyrtari, bisedimet SHBA–Rusi kanë qenë “të gjera, të thelluara dhe konstruktive”, me palën amerikane që ka përcjellë menjëherë detajet tek Kievi.
Edhe pse atmosfera duket pozitive, Washingtoni e pranon se procesi mbetet i brishtë dhe i hapur, ndërsa Trump nuk jep ende asnjë indikacion se sa afër mund të jetë një marrëveshje e mundshme.
