Në një reagim në rrjetin social Truth Social, Trump u shpreh krenar për performancën e astronautëve, duke theksuar se misioni ishte “spektakolar” nga fillimi deri në fund.
“Urime për ekuipazhin e madh dhe shumë të talentuar të Artemis II. I gjithë udhëtimi ishte spektakolar dhe ulja në det ishte perfekte. Nuk mund të isha më krenar,” deklaroi ai.
Misioni përfundoi me sukses pasi kapsula Orion u ul në Oqeanin Paqësor pranë brigjeve të Kalifornisë, duke shënuar një hap të rëndësishëm drejt rikthimit të njeriut në Hënë.
Ekuipazhi i përbërë nga Reid Wiseman, Victor Glover, Christina Koch dhe astronauti kanadez Jeremy Hansen realizoi me sukses fluturimin rreth Hënës, një moment kyç për programin hapësinor të NASA.
Trump nuk u ndal me kaq, duke vendosur edhe objektiva të reja për të ardhmen e eksplorimit hapësinor.
“Hapi tjetër do të jetë që astronautët amerikanë të udhëtojnë drejt Marsit,” theksoi ai.
Misioni Artemis II konsiderohet një nga gurët themeltarë për rikthimin e njeriut në Hënë deri në fund të dekadës, duke hapur rrugën për synime edhe më ambicioze përtej saj.
