Gjiganti amerikan i transportit, Uber, ka njoftuar se planifikon të nisë shërbimin e robot-taksive në Evropë në fillim të vitit 2026, në bashkëpunim me kompaninë kineze të teknologjisë së drejtimit autonom Momenta. Lajmi vjen në kohën kur konkurrenca në tregun e automjeteve pa shofer është duke u ashpërsuar.
Në një deklaratë për mediat, Uber konfirmoi se shërbimi fillestar do të shtrihet në disa qytete evropiane, me operatorë sigurie në bord, ndërsa teknologjia e drejtimit autonom të Momenta-s do të integrohet me rrjetin global të ndarjes së udhëtimeve të Uber.
“Ky bashkëpunim kombinon ekspertizën globale të Uber në ndarjen e udhëtimit me teknologjinë autonome të Momenta-s të mundësuar nga inteligjenca artificiale. Kjo hap rrugën për një të ardhme me mobilitet autonom të përballueshëm dhe të besueshëm,” – deklaroi CEO i Uber, Dara Khosrowshahi.
Ambicie për zgjerim global
Kjo është hera e parë që Uber ndërmerr një përpjekje të madhe për të vendosur automjete autonome jashtë Shteteve të Bashkuara, dhe partneriteti me startup-in kinez Momenta shihet si një hap strategjik drejt zgjerimit ndërkombëtar në teknologjinë e drejtimit autonom.
Drejtori ekzekutiv i Momenta, Shudong Cao, theksoi rëndësinë e marrëveshjes për konsolidimin e ekosistemit të drejtimit autonom:
“Partneriteti me Uber përmbush një element kyç për zgjerimin tonë global dhe përkrah vizionin për të ardhmen e lëvizshmërisë autonome.”
Momenta, me seli në Pekin, ofron dy linja të produkteve:
-
Mpilot, një sistem i avancuar ndihmës për shoferin i gatshëm për prodhim në masë
-
MSD (Momenta Self-Driving), një sistem për drejtim plotësisht autonom
Konkurrenca dhe bashkëpunimet në rritje
Tregu i robot-taksive po bëhet gjithnjë e më konkurues, me kompani të mëdha që kërkojnë të sigurojnë pozicionin e tyre në të ardhmen e transportit. Uber tashmë ka bashkëpunuar me kompani të drejtimit autonom si Motional dhe Waymo në disa qytete amerikane. Megjithatë, Motional pezulloi operimin e robotaksive me Uber dhe Lyft gjatë vitit të kaluar.
Në korrik 2024, Uber lidhi gjithashtu një marrëveshje me prodhuesin kinez të automjeteve elektrike BYD, për furnizimin e flotës së saj me 100,000 automjete elektrike. Bashkëpunimi përfshin edhe zhvillimin e teknologjisë së drejtimit autonom, me BYD që ka prezantuar sistemin “God’s Eye” për një gamë të gjerë modelesh.
Nga dështimi te rimëkëmbja teknologjike
Uber kishte zhvilluar më parë njësinë e saj të automjeteve autonome, por në vitin 2020 ajo ia shiti kompanisë amerikane Aurora Technologies, të mbështetur nga Amazon. Në kuadër të kësaj marrëveshjeje, Uber investoi 400 milionë dollarë në Aurora, si pjesë e strategjisë së saj për të ruajtur praninë në industrinë e drejtimit autonom.
Planet e reja për robot-taksi në Evropë vijnë paralelisht me përgatitjet e Uber për hyrje në tregun slloven, ndërsa kompania përgatitet të forcojë pozitat e saj në kontinentin e vjetër përmes teknologjisë së ardhshme.
