Kompania Rajonale e Ujësjellësit Kompania Rajonale e Ujësjellësit Prishtina ka njoftuar se Impianti për Trajtimin e Ujit (ITU) në Shkabaj ka nisur procesin e trajtimit minimal të ujit, një hap që pritet të ketë ndikim pozitiv në përmirësimin e mëtejshëm të furnizimit me ujë të pijshëm.
Sipas njoftimit për konsumatorët, pas problemeve të theksuara me furnizimin gjatë ditëve të fundit, situata ka filluar të stabilizohet gradualisht. Aktualisht, furnizimi me ujë po realizohet në mënyrë të kontrolluar dhe graduale, në përputhje me kapacitetet teknike ekzistuese të sistemit.
Nga kompania theksohet se ky proces do të ndihmojë në normalizimin e gjendjes në rrjetin e ujësjellësit dhe në rritjen e sigurisë së furnizimit për qytetarët e zonave të prekura.
KRU “Prishtina” ka falënderuar konsumatorët për mirëkuptimin dhe durimin e treguar, duke siguruar se ekipet teknike po vazhdojnë punën për përmirësimin e plotë të situatës.
