Holanda dhe Danimarka janë renditur si vendet më të mira për të qenë fëmijë, sipas një raporti të publikuar të mërkurën nga UNICEF, agjencia e Kombeve të Bashkuara për fëmijët. Raporti vlerëson mirëqenien e fëmijëve në bazë të tri kategorive kryesore: shëndeti mendor, shëndeti fizik dhe aftësitë akademike.
Në listën e 43 vendeve anëtare të Organizatës për Bashkëpunim Ekonomik dhe Zhvillim (OECD) dhe Bashkimit Evropian, Franca zë vendin e tretë, e ndjekur nga Portugalia dhe Irlanda. Ndërkohë, në fund të renditjes qëndrojnë Zelanda e Re, Kolumbia, Meksika, Turqia dhe Kili.
Raporti thekson se shumë vende kanë përjetuar rënie të ndjeshme në performancën akademike të fëmijëve, si pasojë e mbylljes së shkollave gjatë pandemisë Covid-19. Sipas drejtorit të Zyrës së Kërkimeve Innocenti të UNICEF-it, Bo Viktor Nylund, fëmijët po përballen me sfida në shumë drejtime, që përfshijnë ndikime të trashëguara që para pandemisë.
“Tani, përballë pasigurisë në rritje ekonomike, vendet duhet t’i japin prioritet arsimit, shëndetit dhe mirëqenies së fëmijëve, jo vetëm për të siguruar lumturinë e tyre, por edhe për të ruajtur sigurinë ekonomike të shoqërive tona,” deklaroi Nylund.
Sipas të dhënave të raportit, në të 43 vendet e përfshira, rreth 8 milionë 15-vjeçarë – afërsisht gjysma e kësaj grupmoshe – nuk zotërojnë aftësi funksionale të leximit dhe matematikës, duke mos qenë në gjendje të kuptojnë tekste bazë ose të kryejnë llogaritje të thjeshta. Përqindjet më të larta të këtij fenomeni janë regjistruar në Bullgari, Kolumbi, Kosta Rika, Qipro dhe Meksikë.
Megjithatë, raporti evidenton edhe zhvillime pozitive, si rënia e vdekshmërisë foshnjore, ulja e numrit të vetëvrasjeve te adoleshentët dhe përmirësimi i normave të përfundimit të shkollës. Japonia është i vetmi vend që ka shënuar përparim të dukshëm në të gjithë treguesit.
Në anën tjetër, raporti ngre shqetësime për përkeqësimin e shëndetit fizik të fëmijëve, veçanërisht për shkak të rritjes së numrit të fëmijëve mbipeshë dhe rënies së përgjithshme të kënaqësisë me jetën te fëmijët.
“Në mes të pasojave të pandemisë, të dhënat paraqesin një pikë referimi shqetësuese për mirëqenien e fëmijëve, sidomos për ata me prejardhje të pafavorizuar,” paralajmëroi Nylund. “Kjo kërkon një qasje koherente dhe gjithëpërfshirëse që mbulon të gjitha aspektet e fëmijërisë dhe nevojave të saj në çdo fazë të zhvillimit.”
