Presidentja e Komisionit Evropian, Ursula von der Leyen, do të nisë të hënën një tur zyrtar në Ballkanin Perëndimor, me qëllim forcimin e mbështetjes së Bashkimit Evropian për procesin e integrimit të rajonit dhe promovimin e Planit të Rritjes prej 6 miliardë eurosh për periudhën 2024–2027.
Sipas njoftimit të Komisionit Evropian, vizita do të përfshijë ndalesa në Shqipëri, Mal të Zi, Bosnje dhe Hercegovinë, Serbi dhe Kosovë.
Tirana – ndalesa e parë e turit evropian
Turin e saj von der Leyen do ta nisë më 13 tetor në Tiranë, ku do të takohet me Presidentin Bajram Begaj dhe Kryeministrin Edi Rama.
Diskutimet do të fokusohen në rrugën e integrimit të Shqipërisë në BE, forcimin e bashkëpunimit ekonomik dhe përmirësimin e lidhjeve rajonale.
Pas takimeve, presidentja e Komisionit Evropian do të mbajë një fjalim në Konferencën Rajonale të Investimeve për Ballkanin Perëndimor, që do të zhvillohet në kryeqytet. Fjalimi i saj pritet të theksojë angazhimin e BE-së për zhvillimin ekonomik të rajonit dhe nxitjen e investimeve të reja.
Forumi do të hapet me një fjalim mirëseardhjeje nga Kryeministri Rama, ndërsa von der Leyen do të mbajë fjalën kryesore të hapjes.
Takimet në rajon
Pas Shqipërisë, presidentja evropiane do të udhëtojë për në Tivat, Mal i Zi, për t’u takuar me Presidentin Jakov Milatović dhe Kryeministrin Milojko Spajić, ku pritet të diskutohet për reformat integruese dhe bashkëpunimin rajonal.
Në Bosnjë dhe Hercegovinë, von der Leyen do të vizitojë memorialin e Srebrenicës dhe do të zhvillojë takime me anëtarët e Presidencës si dhe me Kryetaren e Këshillit të Ministrave, Borjana Krišto.
Më 15 tetor, ajo do të qëndrojë në Beograd, ku do të takohet me Presidentin Aleksandër Vuçiç dhe Kryeministrin Gjuro Macut, për të diskutuar për progresin e Serbisë në rrugën drejt BE-së dhe mundësitë për bashkëpunim më të ngushtë me Brukselin.
Prishtina – ndalesa e fundit
Turin rajonal, Ursula von der Leyen do ta përmbyllë në Prishtinë, ku do të zhvillojë takime me Presidenten Vjosa Osmani dhe Kryeministrin në detyrë Albin Kurti.
Në agjendë pritet të dominojnë çështjet e integrimit evropian të Kosovës, zbatimi i reformave dhe mbështetja ekonomike nga fondet e BE-së.
Ky tur konsiderohet si një nga vizitat më të rëndësishme diplomatike të vitit në Ballkanin Perëndimor, që synon të riafirmojë angazhimin e BE-së ndaj rajonit në një periudhë vendimtare për procesin e zgjerimit.
