E premtja në Kosovë do të karakterizohet nga moti me diell dhe shumë i nxehtë, si pasojë e valës së fuqishme të të nxehtit veror që ka përfshirë rajonin. Sipas parashikimeve meteorologjike, temperaturat do të lëvizin nga 16°C në orët e mëngjesit, deri në 37°C gjatë mesditës, duke e bërë këtë ditë ndër më të nxehtat e javës.
Institucionet përgjegjëse për motin rekomandojnë kujdes të shtuar, sidomos gjatë orëve të mesditës dhe pasdites, për shkak të niveleve të larta të rrezatimit UV dhe mundësisë për dehidrim apo goditje nga i nxehti, veçanërisht për grupet e ndjeshme si fëmijët, të moshuarit dhe personat me sëmundje kronike.
Nxehtësi përvëluese edhe në Shqipëri dhe rajon
Temperatura ekstreme priten gjithashtu në Shqipëri, Maqedoninë e Veriut, Luginën e Preshevës dhe Mal të Zi, ku dita do të jetë kryesisht me diell dhe shumë e nxehtë. Sipas parashikimeve, në disa zona parashihen vranësira të pakta lokale, por pa ndonjë ndikim të rëndësishëm në kushtet atmosferike.
Në Shqipëri, termometri pritet të shënojë vlera edhe më të larta se në Kosovë, veçanërisht në ultësirat perëndimore ku temperatura mund të tejkalojë 38°C.
🔺 Këshillë për qytetarët: Qëndroni në ambiente të freskëta, konsumoni sa më shumë ujë, shmangni daljet në diell gjatë orëve 11:00–17:00 dhe përdorni krem mbrojtës ndaj rrezeve UV.
