Zëvendëspresidenti i Shteteve të Bashkuara, JD Vance, ka deklaruar se çështja kryesore në raport me Iranin mbetet ndalimi i zhvillimit të armëve bërthamore.
Vance theksoi se Uashingtoni kërkon një angazhim të qartë nga Teherani se nuk do të synojë ndërtimin e armëve nukleare dhe as krijimin e kapaciteteve që mund ta mundësojnë këtë në mënyrë të shpejtë.
“Fakti i thjeshtë është se ne duhet të shohim një angazhim të qartë se ata nuk do të kërkojnë një armë bërthamore dhe nuk do të kërkojnë mjetet për ta arritur atë”, deklaroi ai.
Sipas tij, ky është edhe objektivi kryesor i politikës së presidentit Donald Trump ndaj Iranit.
Duke folur për negociatat e fundit, Vance konfirmoi se SHBA-të kanë paraqitur një ofertë përfundimtare, por pala iraniane nuk e ka pranuar atë.
“Ne i bëmë të qarta vijat e kuqe, por iranianët nuk ranë dakord me kushtet tona. Lajmi i keq është se nuk kemi një marrëveshje”, tha ai, duke shtuar se bisedimet zgjatën rreth 21 orë.
Ai theksoi se delegacioni amerikan kishte hyrë në negociata me fleksibilitet dhe mirëbesim, por pa arritur kompromis me palën tjetër.
Në fund, Vance u shpreh se SHBA-të largohen nga procesi me një ofertë të qartë mbi tavolinë, duke lënë hapësirë që Irani ta shqyrtojë atë nëse dëshiron të rifillojë dialogun.
