Të martën, territori i Kosovës do të përfshihet nga mot shumë i nxehtë dhe kryesisht me diell, si pasojë e depërtimit të vazhdueshëm të masave ajrore të nxehta me origjinë nga Afrika Veriore.
Temperaturat maksimale pritet të arrijnë deri në 38 gradë Celsius, ndërsa nuk parashihen reshje apo freski për pjesën më të madhe të vendit. Vetëm në orët e vona të mbrëmjes, një front i dobësuar ajror mund t’i afrohet skajeve veriore të vendit, me ndonjë vranësirë kalimtare apo rrebesh të izoluar shiu, por pa ndikim domethënës në përmirësimin e kushteve.
Edhe më nxehtë në Shqipëri dhe rajon
Vapa e fortë nuk do të kursejë as vendet fqinje. Në Shqipëri, Maqedoninë e Veriut, Luginën e Preshevës dhe Malin e Zi, pritet mot me diell dhe temperatura ekstreme, që mund të arrijnë deri në 40°C në disa zona të ulëta, veçanërisht në Shqipëri dhe Maqedoninë e Veriut.
Kujdes në orët e mesditës
Autoritetet shëndetësore dhe meteorologët rekomandojnë kujdes të shtuar, veçanërisht gjatë intervaleve të mesditës, kur rrezatimi diellor dhe vapa janë në kulmin e tyre. Këshillohet që të shmangen aktivitetet fizike të rënda dhe qëndrimi i gjatë në diell gjatë kësaj periudhe.
