Deputetët e zgjedhur të Kuvendit të Kosovës do të mblidhen sot në orën 11:00 për të vazhduar seancën e 38-të konstituive, e cila u shty të premten pas thirrjes së një takimi ndërpartiak nga lideri i Lëvizjes Vetëvendosje, Albin Kurti.
Takimi, i cili u mbajt të shtunën dhe zgjati mbi dy orë, nuk arriti të prodhojë një zgjidhje konkrete për tejkalimin e krizës institucionale. Shpresat për një marrëveshje mbetën pezull, me qëndrime të ngurta nga liderët kryesorë të opozitës.
Abdixhiku: Qëndrimet e Kurtit mbeten të pandryshuara
Kreu i Lidhjes Demokratike të Kosovës (LDK), Lumir Abdixhiku, pas përfundimit të takimit, deklaroi se Kurti nuk ka ndryshuar qëndrimet e tij lidhur me situatën në Kuvend.
“Fatkeqësisht, droja jonë u vërtetua. Qëndrimet e deputetit Kurti ishin të njëjtat si më parë dhe nuk e respektonte vendimin e Kushtetueses, as për votimin e fshehtë e as për përgjegjësinë që i takon atij. Për ne, përgjegjësia për krijimin e shumicës i takon Kurtit, sipas paragrafit 130 të aktgjykimit të Kushtetueses,” u shpreh Abdixhiku.
Krasniqi: Kurti po aktron përmbushjen e obligimeve kushtetuese
Edhe kryetari i PDK-së, Memli Krasniqi, e cilësoi takimin si një përpjekje për të dhënë përshtypjen e përmbushjes së obligimeve kushtetuese, por pa ndonjë vullnet të vërtetë për marrëveshje.
“Takimi ishte ndoshta një aktrim për të përmbushur një detyrim të aktgjykimit të fundit të Kushtetueses për konsultime në mirëbesim. Përkundër situatës së re, Kurti mbetet i njëjtë dhe qëndrimet e tij imponuese vazhdojnë ta mbajnë vendin në bllokadë,” deklaroi ai.
Limaj: Të kthehemi tek esenca politike
Ndërkaq, Fatmir Limaj nga Nisma Socialdemokrate theksoi rëndësinë e dialogut politik dhe ftoi palët që të fokusohen në një marrëveshje për të zgjidhur krizën.
“Takimi ishte një hap i mirë, megjithëse i vështirë. Unë dhashë kontributin tim për të kthyer vëmendjen te pritshmëritë e qytetarëve – një marrëveshje politike që do ta zgjidhte menjëherë këtë krizë,” tha Limaj.
Kadrijaj: Forma aktuale e votimit është e papranueshme
Përfaqësuesja e AAK-së, Time Kadrijaj, kritikoi mënyrën se si po tenton të organizohet votimi në Kuvend, duke thënë se insistimi i VV-së për një model të përzier është kundër praktikave ligjore.
“VV-ja ka të drejtë të propozojë kë të dojë, por ka për obligim të sigurojë 61 vota. Kjo mënyrë e përzier e votimit është antiligjore dhe Kushtetuesja ka qenë e qartë për këtë. Shpresoj që Kurti do të reflektojë,” theksoi ajo.
Kurti: Ofrova dy kompromise, por u refuzuan
Në anën tjetër, kryeministri në detyrë dhe lideri i VV-së, Albin Kurti, tha se kishte ofruar dy alternativa kompromisi, por asnjëra nuk u pranua nga partitë opozitare.
“Kompromisi i parë ishte që nëse kandidatja jonë për kryetare nuk merr së paku 61 vota në votim të fshehtë, ajo tërhiqet. I dyti, të arrihet marrëveshje për nenin 67 të Kushtetutës dhe më pas të formohet një komision për të vlerësuar mundësinë e votimit të fshehtë. Asnjëri nuk u pranua,” sqaroi Kurti.
Tash për tash mbetet e paqartë nëse bllokada në Kuvendin e Kosovës do të tejkalohet gjatë seancës së sotme. Sytë janë të drejtuar nga zhvillimet e orëve të ardhshme, të cilat do të dëshmojnë nëse ka vullnet politik për zgjidhje apo vendi do të vazhdojë të mbetet në ngërç institucional.
