Një ngjarje e rëndë ka tronditur mbrëmjen e sotme fshatin Gadime, ku ka ndërruar jetë nxënësi Zejn Zejnullahu, i cili ishte raportuar i zhdukur gjatë ditës.
Sipas informacioneve nga vendi i ngjarjes, fëmija është gjetur në lumin e fshatit, ndërsa menjëherë pas nxjerrjes së tij janë bërë përpjekje intensive për t’i shpëtuar jetën. Banorë të zonës dhe ekipet mjekësore kanë intervenuar me urgjencë, por fatkeqësisht, i mituri nuk ka arritur të mbijetojë.
Lajmi i hidhur është konfirmuar nga familjarë dhe qytetarë që ishin të pranishëm gjatë operacionit të kërkimit dhe ndihmës së parë.
Një nga banorët e fshatit, përmes një postimi në rrjetet sociale, ka shprehur dhimbjen për humbjen e jetës së fëmijës, duke theksuar përpjekjet e mëdha të komunitetit dhe mjekëve për ta shpëtuar.
Rrethanat e sakta të ngjarjes pritet të sqarohen nga autoritetet kompetente, ndërsa trupi i pajetë do t’i nënshtrohet procedurave të mëtejme ligjore.
Ngjarja ka shkaktuar pikëllim të thellë në familje, shkollë dhe komunitetin lokal. Familjes së të ndjerit i shprehen ngushëllime të sinqerta.
