Një ngjarje tragjike ka ndodhur sot në lagjen Veternik të Prishtinës, ku një person ka humbur jetën dhe një tjetër ka mbetur i lënduar si pasojë e shembjes së dheut në një punishte. Ngjarja ndodhi rreth orës 13:00, kur dy punonjës janë zënë nga shembja e dheut në një vendpunishte në rrugën “Gjilani”.
Sipas informacionit të policisë, njëri nga punonjësit ka arritur të nxirret dhe është dërguar për trajtim mjekësor në QKUK, ndërsa tjetri, një mashkull rreth 40 vjeç, është konstatuar i vdekur nga mjekët emergjentë.
Në vendin e ngjarjes janë nisur menjëherë ekipet e policisë dhe zjarrfikësve, të cilët janë duke punuar për sqarimin e plotë të rrethanave të ngjarjes. Zëdhënësi i policisë për rajonin e Prishtinës, Agron Borovci, ka konfirmuar ngjarjen dhe ka theksuar se prokuroria dhe organet e tjera kompetente janë duke vijuar hetimet.
