Vendet arabe të Gjirit po përshpejtojnë planet për rrugë alternative të transportit të naftës, ndërsa tensionet me Iranin dhe kontrolli mbi Ngushtica e Hormuzit vazhdojnë të tronditin tregjet globale të energjisë.
Sipas raportimit të Financial Times, shtetet e rajonit po shqyrtojnë ndërtimin e tubacioneve që do të anashkalojnë plotësisht Gjirin Persik, një lëvizje që vjen si përgjigje ndaj rrezikut të ndërprerjes së furnizimit.
Në qendër të këtyre planeve është modeli i tubacionit Lindje-Perëndim i Arabisë Saudite, i cili tashmë është rikthyer në përdorim intensiv nga Saudi Aramco. Ky tubacion, i ndërtuar që në vitin 1981, lidh lindjen e pasur me naftë me portin Yanbu në Detin e Kuq, duke shmangur plotësisht kalimin përmes Hormuzit.
Me një gjatësi prej rreth 1,200 kilometrash dhe kapacitet deri në 5 milionë fuçi në ditë, infrastruktura ka marrë rol kyç në menaxhimin e krizës aktuale. Eksportet nga Yanbu janë rritur ndjeshëm, duke reflektuar përpjekjet për të ruajtur stabilitetin në furnizimin global.
Ndërkohë, Agjencia Ndërkombëtare e Energjisë e ka cilësuar situatën si ndërprerjen më të madhe të furnizimit me naftë në histori, duke theksuar ndikimin e menjëhershëm të mbylljes së ngushticës në tregjet ndërkombëtare.
Megjithatë, ndërtimi i tubacioneve të reja mbetet një sfidë e madhe për shkak të kostos së lartë dhe kompleksitetit teknik. Pavarësisht kësaj, shtetet e Gjirit duket se janë të vendosura të reduktojnë varësinë nga një pikë e vetme strategjike që sot është kthyer në nyjën më të brishtë të ekonomisë globale.
Në një botë ku energjia është fuqi, kjo krizë po i detyron vendet të mendojnë më gjatë se nesër — sepse një ngushticë e mbyllur mund të mbyllë shumë më tepër sesa vetëm një rrugë detare.
