Viti i Ri 2026 ka hyrë tashmë në çdo cep të globit, duke u shënuar me festime madhështore, masa të shtuara sigurie dhe momente reflektimi në vende të ndryshme të botës. Vendet e Lindjes së Mesme, Azisë dhe Afrikës ishin ndër të parat që përshëndetën vitin e ri, me qytete të ndriçuara nga fishekzjarrë, shfaqje dritash dhe evente festive që tërhoqën vëmendje ndërkombëtare.
Në Dubai, ndërrimi i viteve u shndërrua në një spektakël global, me shfaqje madhështore fishekzjarrësh nga ndërtesa më e lartë në botë, të shoqëruara me koreografi dronësh, muzikë dhe avionë uji, duke e kthyer qytetin në epiqendrën e festimeve botërore.
Në Australi, Viti i Ri u prit nën një atmosferë më solemne. Autoritetet mbajtën një minutë heshtje në nderim të 16 viktimave të sulmit terrorist të ndodhur disa javë më parë në një event hebraik në plazhin Bondi. Pavarësisht kësaj, spektakli tradicional i fishekzjarrëve në Sidnej u zhvillua, por nën masa të rrepta sigurie.
Ndryshe nga vitet e kaluara, Kina anuloi shfaqjen tradicionale të fishekzjarrëve mbi Portin Victoria. Vendimi erdhi pas një zjarri masiv në muajin nëntor, i cili mori jetën e të paktën 161 personave, duke e kthyer ndërrimin e viteve në një moment përkujtimi dhe respekti kombëtar.
Viti i Ri 2026 ka mbërritur gjithashtu në Afganistan, Iran, Korenë e Jugut dhe Rusi, si dhe në shumë vende të tjera anembanë globit, përfshirë Irakun, Turqinë, Arabinë Saudite, Etiopinë, Kenian, Somalinë, Tanzaninë, Madagaskarin, Ugandën, Sirinë, Eritrenë, Jordaninë, Kuvajtin dhe Jemenin.
Me përfundimin e festimeve në zonat e fundit kohore, Viti i Ri 2026 ka hyrë zyrtarisht në të gjithë botën, duke sjellë shpresë për paqe, stabilitet dhe një fillim më të mirë për miliona njerëz.
