Kryeministri Edi Rama ka publikuar fotografi nga një darkë pune e zhvilluar mbrëmjen e së hënës në Bruksel, ku u takua me Presidentin e Këshillit Europian, António Costa.
Në postimin e tij në rrjetet sociale, Rama e cilësoi Costën si “mikun tim të çmuar”, duke e shoqëruar mesazhin me urimin për një ditë të mbarë dhe simbolet e Shqipërisë dhe Bashkimit Europian.
“MIRËMËNGJES dhe me këto momente përpara darkës së mbrëmshme të punës në Bruksel, me Presidentin e Këshillit Europian dhe mikun tim të çmuar, António Costa, ju uroj një ditë të mbarë 🇦🇱🤝🇪🇺”, shkroi Rama.
Sipas burimeve zyrtare, takimi u përqendrua në ecurinë e negociatave të anëtarësimit të Shqipërisë në Bashkimin Europian, progresin e reformave dhe bashkëpunimin e vazhdueshëm të Tiranës me institucionet europiane.
Vizita e Ramës në Bruksel vjen në një moment të ndjeshëm politik për Shqipërinë, të lidhur me hetimet ndaj zv/kryeministres Belinda Balluku, për të cilën një ditë më parë Komisioni Europian i kërkoi Parlamentit shqiptar të mos vonojë procedurat për shqyrtimin e çështjes së imunitetit.
Takimi me Presidentin e Këshillit Europian shihet si pjesë e përpjekjeve të qeverisë shqiptare për të ruajtur ritmin e integrimit europian, pavarësisht zhvillimeve të brendshme politike.
