Presidentja e Republikës së Kosovës, Vjosa Osmani, ka bërë thirrje për qytetarët që të shfrytëzojnë të drejtën e tyre demokratike dhe të dalin të votojnë në zgjedhjet lokale.
“Sot është një ditë e rëndësishme për demokracinë e vendit tonë. Sa më masive dhe e rregullt të jetë pjesëmarrja në procesin zgjedhor, aq më e fortë do të jetë demokracia jonë. Uroj suksese të gjithë atyre që po marrin pjesë dhe shpresoj që ky proces të sjellë rezultate në të mirë të qytetarëve tanë”, tha Osmani.
Presidentja theksoi gjithashtu rëndësinë e përdorimit të të drejtës për të votuar, duke kujtuar se 26 vjet pas çlirimit, qytetarët e Kosovës gëzojnë të drejtën për të garuar dhe për të votuar në liri të plotë. “Është me rëndësi që qytetarët ta shfrytëzojnë këtë të drejtë për të vendosur për të ardhmen e tyre dhe të komunave ku jetojnë”, shtoi ajo.
Osmani komentoi edhe për ndërhyrjet e mundshme të Serbisë në proceset zgjedhore, duke siguruar qytetarët se institucionet e sigurisë janë të angazhuara për të garantuar lirinë e votës për secilin qytetar.
