Presidentja e Kosovës, Vjosa Osmani, ka përshkruar 28 Nëntorin e këtij viti si një “udhëtim zemre nëpër historinë tonë të përbashkët”, duke ndaluar në tri qytete simbol të kombit: Shkodër, Vlorë dhe Tiranë.
Në një postim të ngrohtë e emocional, Osmani tregoi se festa nisi në Shkodër, “që hap dyert si askush tjetër – me rrugë që flasin dhe zemër plot”. Aty, tha ajo, kuptimi i atdhedashurisë është i prekshëm në çdo hap.
Më pas udhëtimi vazhdoi në Vlorë, qytetin e shpalljes së pavarësisë, “ku flamuri nuk valëvitet nga era, por nga historia dhe gjaku”. Për Osmanin, aty 28 Nëntori merr kuptimin e tij më të thellë: amaneti i lirisë dhe krenaria kombëtare.
Mbrëmja u përmbyll në Tiranë, në Pallatin e Brigadave, ku Presidentja theksoi se Shqipëria dhe Kosova nuk janë dy vende të ndara, por “një zemër e vetme që rreh përpara, me besim e me dinjitet”.
“Ky 28 Nëntor ishte kujtesë dhe premtim njëkohësisht,” shkroi Osmani. “Historia na ka dhënë plagë, por edhe arsye të pafundme për krenari. Shqiptarët, kudo që janë, mbeten një komb që di të ngrihet dhe të ecë drejt së nesërmes me kokën lart.”
Mesazhi i saj u prit me vlerësime të shumta, duke u konsideruar një prej urimeve më të fuqishme dhe unifikuese për Ditën e Flamurit.
