Presidentja e Republikës së Kosovës, Vjosa Osmani, ka ndarë këtë javë Medaljen Presidenciale Ushtarake gjeneralmajorit Enrico Barduani, në shenjë mirënjohjeje për kontributin e tij të çmuar gjatë mandatit në krye të KFOR-it.
Sipas një komunikate të Presidentes Osmani, gjeneralmajor Barduani ka dhënë një kontribut të rëndësishëm për paqen dhe sigurinë në Kosovë dhe rajon, duke forcuar prezencën dhe përkushtimin e NATO-s për stabilitet afatgjatë.
“Ky është një simbol i mirënjohjes së popullit tonë për përkushtimin e pandërprerë të NATO-s ndaj paqes dhe sigurisë,” shkroi Presidentja Osmani, duke theksuar rolin e tij vendimtar në ruajtjen e stabilitetit rajonal.
