Presidentja e Kosovës, Vjosa Osmani, ka uruar besimtarët e krishterë me rastin e festës së Krishtlindjes, duke e cilësuar atë si një festë drite dhe shprese.
Në mesazhin e saj, Osmani uroi që Krishtlindja të sjellë paqe në shpirt, dashuri në familje dhe shëndet në çdo shtëpi, duke theksuar rëndësinë e vlerave që e karakterizojnë shoqërinë kosovare.
“Le të na bashkojë tradita jonë e respektit, solidaritetit dhe mikpritjes, duke na dhënë forcë të ecim përpara së bashku, me besim, shpresë dhe mirëkuptim”, ka shkruar Osmani.
Ajo përmbylli urimin me mesazhin: “Gëzuar për shumë mot Krishtlindjen!”, duke përcjellë një thirrje për unitet dhe bashkëjetesë ndërfetare.
