Nënkryetarja e Partisë Demokratike të Kosovës (PDK), Vlora Çitaku, ka reaguar ashpër ndaj sjelljes së Kryesuesit të Kuvendit, duke e akuzuar atë për arbitraritet dhe përdorim të gjuhës së papranueshme ndaj deputetëve.
Në një postim në Facebook, Çitaku ka theksuar se Kryesuesi, ashtu siç ka vepruar tash e pesë muaj, edhe sot u ka mohuar deputetëve kërkesën për një konsultim 10-minutësh para votimit për deputetin Dimal Basha.
“Si pasojë, ne nuk votuam kundër, por abstenuam. Në këtë video vërtetohet qartë, jo vetëm se Kryesuesi e ka dëgjuar dhe parë kërkesën tonë, por dëgjohet edhe gjuha e papranueshme që ai përdori ndaj deputetes më të re të Kuvendit, Sala Jashari, e cila insistonte për pauzën 10-minutëshe: ‘Veç rri ti, veç rri. Edhe unë po i dëgjoj, sikur ti që i dëgjon’”, ka shkruar Çitaku.
Sipas saj, një qasje e tillë nuk ofron zgjidhje dhe është tregues i mungesës së respektit institucional.
“Prandaj, e ftojmë Kryesuesin që të reflektojë dhe të udhëheqë Kuvendin me respekt, dialog dhe përgjegjësi institucionale – siç i takon”, ka përfunduar Çitaku.
