Presidentja e Komisionit Evropian zhvillon një bisedë telefonike me Presidentin Trump për të shmangur një krizë tregtare ndëratlantike.
Presidentja e Komisionit Evropian, Ursula von der Leyen, ka kërkuar zyrtarisht më shumë kohë për arritjen e një marrëveshjeje tregtare me Shtetet e Bashkuara, në një përpjekje për të zbutur tensionet ekonomike ndërmjet dy aleatëve transatlantikë.
Në një bisedë telefonike me Presidentin amerikan Donald Trump, von der Leyen ka propozuar që afati për përmbylljen e marrëveshjes të shtyhet deri më 9 korrik. Ajo e ka cilësuar komunikimin me Uashingtonin si “pozitiv” dhe një hap në drejtim të normalizimit të marrëdhënieve tregtare BE–SHBA.
“Bashkimi Evropian dhe Shtetet e Bashkuara ndajnë marrëdhënien tregtare më të rëndësishme dhe më të ngushtë në botë. Evropa është e gatshme të përshpejtojë bisedimet shpejt dhe me vendosmëri,” – ka deklaruar von der Leyen në rrjetet sociale.
Ajo shtoi se për një marrëveshje të mirë, palët kanë nevojë për kohë shtesë deri më 9 korrik, duke lënë të kuptohet se negociatat janë ende në fazë delikate.
Paralajmërimet nga Shtëpia e Bardhë
Kjo përpjekje diplomatike vjen pas një paralajmërimi të fortë nga Presidenti Trump, i cili ka kërcënuar se duke filluar nga 1 qershori, do të vendosë tarifa 50% për mallrat e importuara nga Bashkimi Evropian.
Trump e cilësoi deficitin tregtar vjetor prej 250 miliardë dollarësh mes SHBA-së dhe BE-së si “të papranueshëm” dhe theksoi se nuk do të lejojë tarifa shtesë për produktet e prodhuara në Shtetet e Bashkuara.
“Negociatat me udhëheqësit e BE-së kanë dështuar”, deklaroi Trump, duke rritur presionin mbi Brukselin për një kompromis të shpejtë.
Tensionet tregtare mes BE-së dhe SHBA-së pritet të dominojnë agjendën ekonomike globale në javët në vijim. Afati i ri i propozuar nga Brukseli për 9 korrikun shihet si një dritare e fundit për shmangien e një përplasjeje doganore që mund të ndikojë në tregjet ndërkombëtare dhe marrëdhëniet transatlantike.
