Presidenti i Serbisë, Aleksandar Vuçiç, zhvilloi një takim me presidentin rus Vladimir Putin në kuadër të vizitës së tij në Moskë për të marrë pjesë në paradën ushtarake të Ditës së Fitores, pavarësisht paralajmërimeve nga Bashkimi Evropian.
Gjatë takimit, dy presidentët diskutuan për zgjatjen e kontratës aktuale të furnizimit me gaz rus, e cila skadon më 31 maj. Vuçiç shprehu optimizëm se Serbia do të sigurojë kushte të favorshme për furnizim afatgjatë me gaz, pas bisedimeve me Putinin në Kremlin.
Presidenti serb falënderoi homologun rus për mbështetjen ndaj integritetit territorial të Serbisë, duke e lidhur këtë qëndrim me mosnjohjen e pavarësisë së Kosovës nga Rusia.
Putin: Dialog pozitiv me Serbinë, miqësi e trashëguar nga Lufta e Dytë Botërore
Presidenti Putin vlerësoi pjesëmarrjen e Vuçiçit në ceremoninë që shënonte 80-vjetorin e fitores ndaj nazizmit, duke e cilësuar si një akt të sjelljes së pavarur dhe sovrane të Serbisë në çështjet ndërkombëtare. Sipas tij, marrëdhëniet ruso-serbe po zhvillohen pozitivisht dhe partneriteti strategjik ndërmjet dy vendeve ka themele të forta historike.
Takim edhe me Xi Jinping: Bashkëpunim ekonomik në fokus
Në Moskë, Vuçiç u takua gjithashtu me presidentin kinez Xi Jinping, i cili e falënderoi për qëndrimin ndaj integritetit territorial të Serbisë. Ata diskutuan për bashkëpunimin ekonomik, ndërsa Vuçiç njoftoi një takim të ardhshëm me Xi në Kinë në shtator.
Thirrje për veprime nga BE: “Nuk mund të vazhdohet si zakonisht”
Vizita e Vuçiçit në Moskë ka shkaktuar reagime të ashpra në Parlamentin Evropian. Grupi i Socialistëve dhe Demokratëve (S&D) i ka bërë thirrje BE-së që të ndërmarrë masa, duke adresuar kërkesën te Përfaqësuesja e Lartë për Politikë të Jashtme, Kaja Kallas, Komisionerja për Zgjerim, Marta Kos, dhe Presidentja e Komisionit Evropian, Ursula von der Leyen.
Në rrjetin social X, eurodeputetët e quajtën bashkëpunimin me Putinin të dëmshëm për Serbinë dhe procesin e zgjerimit të BE-së, duke kërkuar masa të menjëhershme ndaj Beogradit.
Peticion për të anuluar vizitën e Presidentit të Këshillit Evropian në Beograd
Eurodeputeti Riho Terras, raportues për Kosovën në PE, njoftoi nisjen e një peticioni për të anuluar vizitën e planifikuar të Presidentit të Këshillit Evropian, António Costa, në Beograd, të planifikuar për të martën. Terras e cilësoi pjesëmarrjen e Vuçiçit në paradën ruse si mbështetje për gjenocidin në Ukrainë dhe në kundërshtim me vlerat e BE-së.
Terras, anëtar i Partisë Popullore Evropiane (EPP), kujtoi se partia e Vuçiçit – Partia Progresive Serbe (SNS) – është e lidhur me EPP.
Beogradi: Asnjë rrezik për afrimin me BE-në
Ministri i Jashtëm i Serbisë, Marko Gjuriç, u shpreh se vizita e Vuçiçit në Moskë nuk do të ndikojë në procesin e integrimit evropian dhe nuk pret vendosjen e ndonjë sanksioni nga Brukseli. Përkundrazi, ai parashikoi forcim të marrëdhënieve me BE-në, ndërsa Presidenti Costa pritet në Beograd në ditët në vijim.
