Warner Music Group ka mbyllur konfliktin ligjor me startup-in e IA-së Suno dhe po hap një sipërmarrje të përbashkët që do t’u lejojë përdoruesve të krijojnë muzikë të gjeneruar nga inteligjenca artificiale duke përdorur zërin, emrin dhe imazhin e artistëve që zgjedhin të marrin pjesë.
Warner ishte mes gjigantëve të industrisë, përfshirë Sony dhe Universal, që paditën Suno dhe platformën konkurruese Udio, duke i akuzuar se kanë ndërtuar modele që kopjonin këngë ekzistuese dhe prodhonin materiale të padallueshme nga artistët realë.
Sipas marrëveshjes, Suno do të lëshojë modele të reja të licencuara nga viti 2026, ndërsa versioni aktual do të zëvendësohet. Shkarkimet audio do të jenë me pagesë, ndërsa niveli falas mbetet funksional për dëgjim dhe shpërndarje.
Warner thotë se ky është “partneriteti i parë i këtij lloji” dhe se artistët do të kenë kontroll të plotë për mënyrën se si përdoret materiali i tyre — nga zëri te imazhi dhe kompozimet. Kompania nuk ka zbuluar ende cilët artistë do të përfshihen.
Suno, me rreth 100 milionë përdorues, ishte përballur me akuza se po përfitonte duke kopjuar vepra të artistëve, një çështje që ndezi debat të ashpër në industri. Mbi 200 artistë, përfshirë Billie Eilish dhe Nicki Minaj, kishin kërkuar ndalimin e “përdorimit grabitqar” të IA-së në muzikë.
Marrëveshja i mbyll të gjitha paditë mes kompanive dhe hap një kapitull të ri ku krijimi i muzikës me IA formalizohet, licencohet dhe kontrollohet nga vetë artistët.
