Dogana e Kosovës, në bashkëpunim me Policinë e Kosovës, ka zhvilluar dy operacione të ndara gjatë ditës së hënë, duke parandaluar kontrabandimin dhe futjen e mallrave të padeklaruara në territorin e vendit.
Në rastin e parë, Task Forca – Lindje, e përbërë nga zyrtarë të Doganës dhe Policisë, ka ndaluar një automjet furgon në rrugën Viti–Gerlicë, i cili dyshohej se transportonte mallra të kontrabanduara përmes rrugëve ilegale që lidhin Kosovën me Maqedoninë e Veriut.
Gjatë kontrollit të mjetit, që drejtohej nga një 29-vjeçar me inicialet U.U. nga Vitia, janë gjetur mallra pa dokumentacion përkatës:
-
40 thasë fara me peshë nga 25 kg (rreth 1,000 kg në total)
-
50 pako kumbulla të thata, me peshë 10 kg secila (rreth 500 kg gjithsej)
Sipas vlerësimeve fillestare, mallrat e kontrabanduara kapin vlerën mbi 10,000 euro, pa përfshirë shmangiet tatimore dhe taksat doganore. Automjeti dhe mallrat janë sekuestruar dhe dërguar në terminalin doganor për procedura të mëtejshme.
Në rastin e dytë, në pikën kufitare të Vërmicës në Prizren, zyrtarët doganorë kanë ndaluar një automjet të udhëtarëve për kontroll të detajuar.
Megjithëse drejtuesi i mjetit kishte deklaruar se nuk posedonte mallra për t’u deklaruar, gjatë inspektimit janë zbuluar mallra me natyrë tregtare të fshehura në ulëset e pasme dhe në bagazh, përfshirë:
-
18 thasë me 144 palë mbathje sportive të markës “Nike”
-
Rreth 600 pako me më shumë se 7,500 copë suplemente ushqimore
Asnjë prej këtyre produkteve nuk ishte shoqëruar me faturë apo dokumentacion ligjor. Sipas Doganës, vlera e përgjithshme e mallrave të padeklaruara është 5,554 euro, ndërsa shmangia e detyrimeve doganore llogaritet në 1,655 euro.
Ndaj drejtuesit të automjetit është iniciuar procedurë kundërvajtëse në bazë të nenit 253 të Kodit Doganor dhe të Akcizës së Kosovës (KDAK).
Dogana e Kosovës ka theksuar në reagimin e saj zyrtar se rastet e tilla trajtohen me prioritet të lartë, duke paralajmëruar se mosdeklarimi i mallrave përbën shkelje të ligjit dhe ndëshkohet sipas dispozitave në fuqi.
Institucioni gjithashtu u ka bërë apel qytetarëve dhe bizneseve që të respektojnë rregullat doganore dhe të shmangin kontrabandën, si pjesë e përpjekjeve për mbrojtjen e tregut vendor dhe rritjen e integritetit ekonomik të vendit.
