Mesfushori i Kombëtares shqiptare, Ylber Ramadani, ishte protagonist absolut në javën e 25-të të Serie A, duke realizuar gol në fitoren 0-2 të US Lecce në transfertë ndaj Cagliari Calcio.
Goli i Ramadanit erdhi në minutën e 76-të, pas një goditjeje të fuqishme nga jashtë zone. Me një diagonale të saktë nga e majta drejt shtyllës së parë, ai mposhti portierin Elia Caprile dhe vulosi fitoren e ekipit të tij.
Paraqitja e 29-vjeçarit nuk kaloi pa u vënë re. Falë golit dhe performancës së tij solide në mesfushë, Ramadani u përfshi në formacionin e javës në Serie A, duke u renditur krah emrave të mëdhenj si Luka Modrić i AC Milan dhe kapiteni i Juventus FC, Manuel Locatelli.
Ramadani u vlerësua me notën e lartë 8.3, një nga më të mirat e javës, duke konfirmuar formën e shkëlqyer dhe rolin e tij kyç te Lecce.
Performanca e tij është lajm i mirë edhe për Kombëtaren shqiptare, teksa mesfushori po fiton gjithnjë e më shumë peshë në një nga kampionatet më të forta në Evropë.
