YouTube ka njoftuar ndryshime të reja në mënyrën e shpërndarjes së reklamave, me synimin për të rritur të ardhurat dhe për të përmirësuar përvojën e përdoruesve. Platforma e njohur e videove online do të përdorë inteligjencën artificiale për të përcaktuar momentet më të përshtatshme për vendosjen e reklamave gjatë videove.
Në njoftimin zyrtar, YouTube bëri të ditur se do të përdorë modelin e avancuar të inteligjencës artificiale “Gemini” të Google për të analizuar përmbajtjen e videove dhe për të identifikuar pikat kur audienca është më e përfshirë emocionalisht apo më e angazhuar. Reklamat do të vendosen në ato segmente të videove që platforma i cilëson si “momente kulmore”.
“Shembull konkret është një video fejese,” – thotë YouTube. “Një reklamë mund të vendoset strategjikisht menjëherë pasi burri i bën pyetjen, për të përfituar nga momenti emocional i audiencës.”
Kjo veçori e re quhet “pikat kryesore” dhe po prezantohet si pjesë e aktiviteteve për të shënuar 20-vjetorin e krijimit të YouTube.
Sipas kompanisë, YouTube ka regjistruar të ardhura prej 8 miliardë eurosh vetëm në tremujorin e parë të vitit 2025, që përfaqëson një rritje prej 10% krahasuar me të njëjtën periudhë të vitit të kaluar. Kjo shifër nuk përfshin të ardhurat që vijnë nga abonimet e përdoruesve, raporton Euronews.
“Pikat kryesore” përfaqësojnë përpjekjen më të fundit të Google për të integruar inteligjencën artificiale në sistemin e reklamimit, duke maksimizuar efikasitetin e fushatave publicitare dhe duke gjeneruar të ardhura të reja për kompaninë.
